سیف سٹی مری کی جانب سے سٹی ٹریفک پولیس مری کو باڈی کیم کی سہولت فراہم کر دی گئی

منگل 3 جون 2025 23:20

راولپنڈی (اُردو پوائنٹ اخبارتازہ ترین - اے پی پی۔ 03 جون2025ء) وزیر اعلیٰ پنجاب مریم نواز کے محفوظ پنجاب کے ویژن پر عملدرآمد کرتے ہوئے سیف سٹی مری کی جانب سے سٹی ٹریفک پولیس مری کو باڈی کیم کی سہولت فراہم کر دی گئی ہے۔

(جاری ہے)

اس جدید سہولت کے تحت اب سٹی ٹریفک پولیس مری دوران ڈیوٹی اپنے ارد گرد کے حالات اور قانون شکنی کرنے والوں کے خلاف کی جانے والی کارروائی کو باقاعدہ ریکارڈ کر سکے گی جس سے نہ صرف شفافیت کو فروغ ملے گا بلکہ ٹریفک قوانین کی مؤثر عملداری بھی یقینی بنائی جا سکے گی۔

اس موقع پر سی ٹی او مری مغیث احمد ہاشمی نے کہا کہ شہریوں کو ٹریفک قوانین کی پاسداری کر کے ایک مہذب اور ذمہ دار شہری ہونے کا ثبوت دینا چاہیے۔ ان کا کہنا تھا کہ ٹریفک قوانین پر عمل درآمد نہ صرف سفر کو آسان بناتا ہے بلکہ یہ اپنی اور دوسروں کی جان کے تحفظ کی ضمانت بھی ہے۔ انہوں نے کہا کہ باڈی کیم کا اجرا ایک خوش آئند اقدام ہے جو سٹی ٹریفک پولیس مری کی کارکردگی میں بہتری، شفافیت اور قانون کی عملداری کو فروغ دے گا۔