Live Updates

نئی ٹی ٹونٹی رینکنگ، محمد حارث کی حیران کن 210 درجے ترقی

حسن نواز، صائم، عباس آفریدی کی پوزیشنز میں بھی بہتری آگئی، بابر اعظم، محمد رضوان اور شاہین آفریدی کی تازہ ترین ٹی ٹونٹی رینکنگ میں تنزلی

ذیشان مہتاب بدھ 4 جون 2025 13:52

نئی ٹی ٹونٹی رینکنگ، محمد حارث کی حیران کن 210 درجے ترقی

لاہور (اردو پوائنٹ تازہ ترین اخبار ۔ 4 جون 2025ء ) بنگلہ دیش کے خلاف پاکستان کی T20I سیریز میں 3-0 سے وائٹ واش نے تازہ ترین ٹی ٹونٹی رینکنگ میں مثبت جھلکیاں ظاہر کی ہیں جس میں کئی کھلاڑیوں نے نمایاں فائدہ اٹھایا ہے۔

وکٹ کیپر بیٹر محمد حارث حیران کن 210 درجے کی چھلانگ لگا کر 580 ریٹنگ پوائنٹس کے ساتھ بیٹنگ رینکنگ میں 30 ویں نمبر پر پہنچ گئے۔

حارث نے اپنی تباہ کن صلاحیت کا مظاہرہ کرتے ہوئے سیریز کے آخری میچ میں کسی بھی پاکستانی بلے باز کی جانب سے دوسری تیز ترین T20I سنچری درج کی۔

ابھرتے ہوئے مڈل آرڈر بلے باز حسن نواز جنہوں نے پوری سیریز میں بلے سے کلیدی کردار ادا کیا، نے بھی رینکنگ میں ترقی پائی اور 540 پوائنٹس کے ساتھ 57 درجے ترقی کرکے 45 ویں نمبر پر پہنچ گئے۔

(جاری ہے)

واپس آنے والے نوجوان کھلاڑی صائم ایوب جنہوں نے تیسرے T20I میں اپنا اثر ڈالا، وہ 4 درجے چڑھ کر 61 ویں نمبر پر پہنچ گئے اب وہ 485 پوائنٹس پر ہیں۔

اس دوران تین میچوں کی سیریز میں 90 رنز بنانے والے کپتان آغا سلمان 42 درجے کی چھلانگ لگا کر 430 پوائنٹس کے ساتھ 75 ویں نمبر پر پہنچ گئے۔

تاہم رینکنگ کی تمام خبریں پاکستان کے لیے مثبت نہیں تھیں۔ سینئر بلے باز بابر اعظم، محمد رضوان اور فخر زمان کو تنزلی کا سامنا کرنا پڑا۔

فخر 406 پوائنٹس کے ساتھ 10 درجے تنزلی کے ساتھ 87 ویں نمبر پر ہیں جبکہ بابر اور رضوان دونوں تین درجے گر کر بالترتیب 12 ویں اور 13 ویں نمبر پر ہیں۔

بیٹنگ رینکنگ میں آسٹریلیا کے ٹریوس ہیڈ بدستور سرفہرست ہیں جس کے بعد بھارت کے ابھیشیک شرما دوسرے اور انگلینڈ کے فل سالٹ تیسرے نمبر پر ہیں۔

باؤلنگ رینکنگ میں عباس آفریدی اپنی پرفارمنس سے متاثرکن ثابت ہوئے، 605 پوائنٹس کے ساتھ 18 درجے چھلانگ لگا کر 19 ویں نمبر پر آگئے۔

نائب کپتان شاداب خان بھی رینکنگ میں 24 درجے بہتری کے ساتھ 59 ویں نمبر پر آگئے جہاں اب وہ ابرار احمد کے ساتھ برابر ہیں جنہوں نے 45 مقام کی چھلانگ لگائی۔

اس کے برعکس نسیم شاہ، سفیان مقیم، حارث رؤف اور شاہین آفریدی اپنی رینکنگ میں تنزلی کے بعد بالترتیب 94 ویں، 83 ویں، 19 ویں اور 36 ویں نمبر پر ہیں۔

بولنگ رینکنگ میں نیوزی لینڈ کے جیکب ڈفی پہلے نمبر پر ہیں، اس کے بعد ویسٹ انڈیز کے اکیل ہوسین دوسرے اور بھارت کے ورون چکرا ورتھی تیسرے نمبر پر ہیں۔