میں چاہتا ہوں پاکستانی کرکٹ ٹیم قوم کا فخر بنے : مائیک ہیسن

میں پاکستانی کرکٹ ٹیم کو ایسا بنانا چاہتا ہوں کہ قوم اپنی ٹیم کو بہترین کرکٹ ٹیم کہے، ہیڈ کوچ کی گفتگو

ذیشان مہتاب جمعہ 6 جون 2025 16:02

میں چاہتا ہوں پاکستانی کرکٹ ٹیم قوم کا فخر بنے : مائیک ہیسن

اسلام آباد (اردو پوائنٹ تازہ ترین اخبار ۔ 6 جون 2025ء ) قومی کرکٹ ٹیم کے نئے وائٹ بال ہیڈ کوچ مائیک ہیسن نے کہا ہے کہ میں چاہتا ہوں پاکستانی کرکٹ ٹیم قوم کا فخر بنے۔

مائیک ہیسن نے پاکستان کرکٹ بورڈ (پی سی بی) کے پوڈ کاسٹ میں شرکت کی جہاں اٴْنہوں نے ٹیم کے مستقبل کیلئے اپنے کوچنگ فلسفے اور ویژن کے بارے میں بات کی۔

انہوں نے کہا کہ میں پاکستان کرکٹ ٹیم کو ایسا بنانا چاہتا ہوں کہ قوم اپنی ٹیم کو بہترین کرکٹ ٹیم کہے۔

مائیک ہیسن نے کہا کہ کوچنگ ٹیلنٹ کو نکھارنے کی کوشش کا نام ہے اس لیے یہ ضروری نہیں کہ میں کھلاڑیوں کو ان عظیم چیزوں کے بارے میں بتاؤں جو میں نے اپنے وقت کے دوران کیں۔

انہوں نے کھلاڑیوں کے ساتھ مضبوط تعلقات استوار کرنے کی اہمیت پر زور دیتے ہوئے کہا کہ ایک بار جب آپ کسی کھلاڑی کے سفر کو سمجھ لیتے ہیں تو آپ اس کی اہمیت میں اضافہ کر سکتے ہیں۔

(جاری ہے)

مائیک ہیسن نے کہا کہ تمام کھلاڑی یہ جاننے کے حقدار ہیں کہ ان سے کیا توقع کی جاتی ہے اور اس کے لیے پہلے کھلاڑی کی کارکردگی کا مشاہدہ کرنا ضروری ہے۔

انہوں کہا کہ میں نئے کھلاڑیوں سے ملنے اور بات کرنے کا خواہشمند ہوں، یہ عمل اس بات کو یقینی بنائے گا کہ کھلاڑی تربیت یافتہ، ورسٹائل اور قومی فرائض کیلئے بلائے جانے پر آگے بڑھنے کے لیے تیار ہیں۔

مائیک ہیسن نے کہا کہ مجھے امید ہے کہ میں کامیابی کی ایسی بنیاد رکھوں گا جو میرے جانے کے بعد بھی برقرار رہے گی اور مستقبل کے کوچز کیلیے ہموار جانشینی کو یقینی بنائے گی۔

انہوں نے کہا کہ اگر کسی کوچ کے چلے جانے سے چیزیں خراب ہونا شروع ہوجاتی ہیں تو اس کا مطلب ہے کہ وہ اچھا کام نہیں کر سکا۔