Live Updates

وزیراعلی خیبرپختونخوا کے معاون خصوصی برائے صنعت عبد الکریم کی زیر صدارت اجلاس کا انعقاد

بدھ 4 جون 2025 22:30

پشاور (اُردو پوائنٹ اخبارتازہ ترین - اے پی پی۔ 04 جون2025ء) وزیراعلی خیبرپختونخوا کے معاون خصوصی برائے صنعت عبدالکریم تورڈھیر کی زیر صدارت پشاور میں پاکستان ٹوبیکو بورڈ کی صوبے کو ممکنہ منتقلی کے تناظر میں مجوزہ صوبائی ٹوبیکو بورڈ کیلئے قانون کے ابتدائی مسودے پر مشاورت اور سٹیک ہولڈرز کی آراء سننے کے حوالے سے ایک اجلاس منعقد ہوا ،جس میں محکمہ زراعت کے ایڈیشنل سیکرٹری دل نواز خان،ڈی جی زراعت ریسرچ ڈاکٹر عبد الرئوف،ڈائریکٹر زراعت مراد علی،ڈپٹی ڈائریکٹر ٹریڈ ڈویلپمنٹ اتھارٹی آف پاکستان ایاز محمد،سابق ممبر بورڈ آف ڈائریکٹرز پاکستان ٹوبیکو بورڈ محمد ایاز،سیکرٹری پاکستان ٹوبیکو بورڈ فخرالدین،لیگل آفیسر محکمہ قانون صائمہ سہیل اور دیگر متعلقہ حکام نے شرکت کی۔

اجلاس میں وفاقی ادارے پاکستان ٹوبیکو بورڈ کے صوبے کو متوقع منتقلی کے تناظرمیں اسکے لئے متعلقہ محکمے کی جانب سے تیار کئے جانے والے صوبائی ایکٹ کے ابتدائی مسودے پر تبادلہ خیال کیا گیا اور اس سلسلے میں محکمہ زراعت سے محکمہ قانون بھیجے جانے والے مسودے اور اس سلسلے میں معاون خصوصی کی جانب سے اس کے بعض پہلوں میں مزید بہتری لانے کے حوالے سے بعض نکات و شقوں کا تقابلی جائزہ لیا گیا جبکہ اجلاس کے شرکاء نے بھی اس سلسلے میں اپنی تجربات کی بنیاد پر تجاویز دیں۔

(جاری ہے)

اس موقع پر محکمہ زراعت کے حکام نے فورم کے تجاویز کو مجوزہ ایکٹ کے مسودے میں شامل کرنے کی یقین دہانی کرائی جسے حتمی شکل دینے سے پہلے شرکا ء کیساتھ دوبارہ زیر بحث لایا جائے گا۔اس موقع پر معاون خصوصی کا کہنا تھا کہ تمباکو اس صوبے کی پیداوار ہے ،اس کی ترقی کیلئے تحقیق اور معیار میں جدت لانا ضروری ہے تاکہ یہ شعبہ زیادہ منافع بخش ہو سکے۔انہوں نے کہا کہ صوبائی قانون لانے میں تمباکو پیدا کرنے والے کسانوں کا فائدہ ملحوظ خاطر رکھنا چاہئے تاکہ حکومتی قوانین سے انہیں ریلیف پہنچے۔