Live Updates

پاکستان کی فارما انڈسٹری میں بے پناہ صلاحیت ہے ،برآمدات بڑھانے کیلئے موثر اقدامات کئے جائیں ، وفاقی وزیر مصطفی کمال

بدھ 4 جون 2025 21:40

اسلام آباد (اُردو پوائنٹ اخبارتازہ ترین - این این آئی۔ 04 جون2025ء)وفاقی وزیر قومی صحت مصطفی کمال نے کہا ہے کہ پاکستان کی فارما انڈسٹری میں بے پناہ صلاحیت ہے ،ایکسپورٹ کو بڑھانے کیلئے موثر اقدامات کئے جائیں ،فارماسیوٹیکل صنعت کی مقامی سطح پر ترقی اور خود انحصاری کے لئے بھرپور اقدامات کرے ۔ان خیالات کا اظہار انہوں نے پاکستان فارماسیوٹیکل مینوفیکچررز ایسوسی ایشن کے وفد سے ملاقات کے دوران کیا ۔

ملاقات میں مقامی پیدوار کی تیاری و برآمدی مواقع ڈرگ رولز میں اصلاحات کا جائزہ بھی لیا گیا۔اس موقع پر ایکٹو فارماسیوٹیکل انگریڈینٹس کی مقامی پیداوار سے متعلق اہم امور پر تفصیلی تبادلہ خیال کیا گیا۔افغانستان کے ساتھ باہمی تجارتی معاہدے اور اے پی آئی کی مقامی تیاری پر پیشرفت پر بھی بات چیت ہوئی۔

(جاری ہے)

وفاقی وزیر نے کہا کہ مشترکہ طور پر اے پی آئی کی مقامی تیاری کو یقینی بنائیں گے تاکہ قیمتی زرمبادلہ کی بچت کی جا سکے۔

انہوں نے کہا کہ ڈریپ نفتھا کریکر منصوبے کے قیام سے متعلق ایک جامع رپورٹ پیش کرے، یہ اقدام فارماسیوٹیکل صنعت کے لئے ضروری خام مال کی خود کفالت کے حصول کے مقصد سے کیا جا رہا ہے ۔انہوں نے کہا کہ ہمیں مل کر اے پی آئی ایس کی مقامی پیداوار کو یقینی بنانا ہے تاکہ زرمبادلہ کے ضیاع کو روکا جا سکے ،ملکی ادویات کو عالمی منڈیوں تک پہنچانے کیلئے مربوط اقدامات کرنا ہوں گے، جعلی ادویات کے خاتمے کے لئے حکومت پرعزم ہے ،اس مقصد کے لئے ایک جدید بار کوڈ نظام متعارف کرایا جا رہا ہے جس کے تحت ہر دوا پر بار کوڈ پرنٹ کیا جائے گا،اس بار کوڈ کے ذریعے مریض کسی بھی دوا کی اصل شناخت اور قیمت کی تصدیق باآسانی کر سکے گا ۔

انہوں نے کہا کہ جعلی ادویات سے پاکستان کی ساکھ اور فارماسیوٹیکل انڈسٹری کی شہرت بھی متاثر ہوتی ہے ،یہ انسانی جانوں کا معاملہ ہے جس پر کوئی سمجھوتہ نہیں کیا جا سکتا ،فارما انڈسٹری اس سلسلے میں تمام تر ضروری اقدامات کرے ۔ملاقات میں ایڈیشنل سیکرٹری ہیلتھ چیف ایگزیکٹو آفیسر ڈریپ بھی موجود تھے۔