ثناء یوسف نے گرمیوں کی چھٹیاں والدہ کے گھر منانے کا پروگرام بنایا تھا مگر کیا خبر تھی کہ وہ تابوت میں ہم سے ملنے آئے گی، چچا کوثر علی شاہ

چترال(اردوپوائنٹ اخبار تازہ ترین۔05 جون 2025) اسلام آباد میں قتل ہونے والی ٹک ٹاکر ثناء یوسف کے چچا کوثر علی شاہ نے کہا ہے کہ ثناءیوسف نے گرمیوں کی چھٹیاں اپنی والدہ کے گھر منانے کا پروگرام بنایا تھا مگر کیا خبر تھی کہ وہ تابوت میں ہم سے ملنے آئے گی،ثنا یوسف ہر برس اپنے والدین کے ساتھ گرمیوں کی چھٹیاں منانے چترال آتی تھی جبکہ اس دفعہ بھی انہوں نے عید کے بعد آنے کا کہا تھا۔

میڈیا سے گفتگو کرتے ہوئے ثناءیوسف کی موت کی خبر نے ہلا کر رکھ دیا ہے ہمیں کیا خبر تھی کہ عید سے پہلے ہی اس کے جنازے پر تمام اہل خانہ اکٹھے ہوں گے۔اس کی موت نے ہر چترالی کو افسردہ کر دیا ہے۔ گاوں میں سوگ کی فضا ہے، بچے بوڑھے اور خواتین سب ثنا یوسف کو یاد کر کے رو رہے ہیں۔ کسی کو یقین نہیں آرہا کہ اپنی باتوں سے سب کو ہنسانے والی اپنے پیچھے سب کو رلا گئی ہے۔

(جاری ہے)

انہوں نے کہا کہ ثنا یوسف نے اس دفعہ بھی اپنی والدہ کے گھر بونی میں چھٹیاں گزارنے کا منصوبہ بنایا تھا پھر ان کا مختلف خوبصورت مقامات میں جاکر ویڈیو کنٹینٹ بنانے کا ارادہ تھا۔ ثنا یوسف نے والدین کی مرضی سے سوشل میڈیا کی دنیا میں قدم رکھا تھا اور ان کے والدین نے ہمیشہ ان کو سپورٹ کیا۔کوثر علی شاہ نے بتایا کہ ثنا یوسف ایف ایس سی فرسٹ ایئر کی طالبہ تھی۔

تعلیمی قابلیت کے ساتھ وہ غیرنصابی سرگرمیوں میں تمام طلبہ سے آگے رہتی تھی۔مقتولہ ثناءکوثر کے چچا کوثر علی شاہ نے گفتگو کرتے ہوئے مزید کہا کہ ثنا یوسف بہت ملنساراور ہنس مکھ لڑکی تھی، وہ اسلام آباد میں رہنے کے باوجود اپنے علاقے کے بارے میں فکر مند رہتی تھی اس کی خواہش تھی کہ وہ انٹرپرینیور بنے تاکہ علاقے کے لوگوں کی ان کے پاوں پر کھڑا ہونے میں مدد کر سے۔

ثنا یوسف کا ارادہ تھا کہ وہ گاوں کی خواتین کو ڈیجیٹل میڈیا کے شعبے میں تربیت دے تاکہ ان کو بااختیار بنایا جا سکے مگر اس کا خواب ادھورا رہ گیا۔ ٹک ٹاکر ثناءیوسف کے چچا کامزید یہ بھی کہنا تھا کہ پورے خاندان اور چترال کو فخر ہے کہ ثنا نے اپنی عزت کا خیال رکھا اور اس قاتل نوجوان کی دھمکیوں کے باوجود اس کی بات نہ مانی۔خیال رہے کہ گزشتہ روزٹک ٹاکر ثناءیوسف کے قتل کیس میں گرفتار مرکزی ملزم عمر حیات کے تفتیش میں اہم انکشافات کئے تھے ۔

ملزم نے قتل کی وجوہات بھی بتا دیں تھیں۔ ملزم نے جرم کا اعتراف کرتے ہوئے ثناءیوسف کو قتل کرنے کی تمام تفصیلات بتا ئی تھیں۔ملزم نے اپنے ابتدائی بیان میں بتایاتھا کہ مجھے اس بات کا رنج تھا کہ وہ مجھ سے نہیں ملی اسی دکھ میں میں نے اسے مار دیاتھا۔بتایاگیا تھا کہ2 جون کوٹک ٹاکرثناءیوسف کی سالگرہ کے موقع پرملزم عمر حیات تحائف اور کیک لے کر پہنچا تھا مگر ثناءنے اسے ملنے سے صاف انکار کر دیاتھا۔

ملزم سے ہونے والی تحقیقات کے مطابق عمر حیات فیصل آباد سے کرائے پر لی گئی فارچونر گاڑی کے ذریعے اسلام آباد پہنچا تھا وہ پہلے 29 مئی اور پھر 2 جون کو ثناءیوسف سے ملنے اسلام آباد آیا تھا تاہم مقتولہ ثناء یوسف نے دونوں بار ملاقات سے انکار کیاتھا۔ذرائع کے مطابق عمر حیات نے گاڑی کا کرایہ بھی ادا نہیں کیا تھا جس پر رینٹ اے کار کے مالک نے ملزم کی گرفتاری کے بعد پولیس کارروائی کے دوران پیسے وصول کرنے کیلئے خود سامنے آ کر دعویٰ کیاتھا۔

ذرائع کا کہنا تھا کہ قتل کے بعد عمر حیات جائے واردات سے فرار ہوگیااس نے پہلے بائیک رائیڈ بک کی پھر راستے میں اتر کر ایک ٹیکسی کے ذریعے اسلام آباد کے لاری اڈے پہنچا جہاں سے وہ فیصل آباد روانہ ہو گیاتھا۔پولیس کی جانب سے کیس کی مزید تحقیقات جاری ہیں جب کہ موبائل ڈیٹا، گاڑی کی سی سی ٹی وی فوٹیجز اور دیگر شواہد بھی حاصل کئے جا رہے ہیں تاکہ کیس کو منطقی انجام تک پہنچایا جا سکے۔