پاکستان میڈیکل اینڈ ڈینٹل کونسل کا متعارف کردہ ڈیجیٹل لائسنسنگ سسٹم صحت کے شعبے میں انقلابی قدم ہے،ڈاکٹر شکیل احمد

جمعرات 5 جون 2025 17:20

سیالکوٹ (اُردو پوائنٹ اخبارتازہ ترین - اے پی پی۔ 05 جون2025ء) سینئر میڈیکل آفیسر ڈاکٹر شکیل احمد نے کہا ہے کہ پاکستان میڈیکل اینڈ ڈینٹل کونسل ( پی ایم اینڈ ڈی سی ) کی جانب سے حال ہی میں متعارف کردہ ڈیجیٹل لائسنسنگ سسٹم صحت کے شعبے میں انقلابی پیش رفت ہے۔ انہوں نے اے پی پی سے گفتگو کرتے ہوئے کہا کہ پی ای اینڈ ڈی سی کا نیا لائسنسنگ سسٹم اس شعبے کی بنیادی ضرورت تھا ،یہ اقدام نہ صرف ڈاکٹروں اور ڈینٹل پریکٹیشنرز کے لیے آسانی کا باعث بنے گا بلکہ پاکستان میں طب کے شعبے میں شفافیت، تیزی اور عوامی اعتماد کو فروغ بھی دے گا۔

انہوں نے کہا کہ گزشتہ کئی سالوں سے ڈاکٹروں کو رجسٹریشن، لائسنس کی تجدید، یا سرٹیفکیٹ کے حصول کے لیے بارہا دفاتر کے چکر لگانے پڑتے تھے۔

(جاری ہے)

اب لاہور سمیت دیگر بڑے شہروں میں ڈیجیٹل مراکز کا قیام اس عمل کو مؤثر، شفاف اور وقت کی بچت والا بنا دے گا۔انہوں نے کہا کہ شیخ زید میڈیکل کمپلیکس لاہور میں قائم ہونے والا پہلا ریجنل آفس ڈاکٹروں کو جدید سہولیات کی فراہمی میں ایک سنگِ میل ثابت ہو گا۔

یہ نظام نہ صرف نوجوان ڈاکٹروں کے لیے امید کی کرن ہے بلکہ ایسے سینئر پروفیشنلز کے لیے بھی نعمت ہے جو مختلف شہروں سے آ کر وفاقی دفاتر کے چکر لگانے سے قاصر ہوتے تھے۔ انہوں نے پی ایم اینڈ ڈی سی کی قیادت، بالخصوص پروفیسر ڈاکٹر رضوان تاج کو خراج تحسین پیش کیا جن کی زیرنگرانی اس جدید سسٹم کی بنیاد رکھی گئی۔انہوں نے تجویز دی کہ اس سسٹم کو جلد کراچی، پشاور، کوئٹہ ، ملتان اور دیگرشہروں تک توسیع دی جائے تاکہ ملک بھر کے میڈیکل پروفیشنلز کو یکساں سہولت میسر آ سکے۔انہوں نے کہا کہ ایسے اقدامات ہی پاکستان میں صحت کے شعبے کو عالمی معیار کے قریب لا سکتے ہیں