وزیر اعلیٰ خیبر پختونخوا علی امین خان گنڈاپور سے مختلف سیمنٹ فیکٹریز کے اعلیٰ حکام پر مشتمل وفد کی ملاقات

جمعرات 5 جون 2025 17:33

پشاور (اُردو پوائنٹ اخبارتازہ ترین - اے پی پی۔ 05 جون2025ء) وزیر اعلیٰ خیبر پختونخوا علی امین خان گنڈاپور سے مختلف سیمنٹ فیکٹریز کے اعلیٰ حکام پر مشتمل وفد نے ملاقات کی۔ وزیر اعلی ہائوس پشاور حکام کی جانب جاری شدہ تفصیلات کے مطابق ملاقات میں سیمنٹ انڈسٹری کو درپیش مسائل، انکے حل اور صوبے میں سیمنٹ انڈسٹری کے فروغ سے متعلق امور پر تبادلہ خیال کیا گیا جبکہ ملاقات میں فی ٹن سیمنٹ رائلٹی 250 روپے سے بڑھا کر 350 روپے کرنے پر اتفاق کیا گیا اور رائلٹی میں ابتدائی دو سال تک 10 فیصد جبکہ اگلے تین سال تک 7.5 فیصد اضافہ پر بھی اتفاق کیا گیا۔

وزیر اعلیٰ کی سیمنٹ انڈسٹری کے فروغ کے لیے ہر ممکن تعاون فراہم کرنے کی یقین دہانی کی گئی ۔ وزیر اعلیٰ نے وفد کو جپسم، پلیسر گولڈ ، معدنی مصنوعات کی صوبے میں ویلیو ایڈیشن میں بھی سرمایہ کاری کی دعوت دی۔

(جاری ہے)

وزیر اعلیٰ خیبر پختونخوا علی امین گنڈاپور نے کہا کہ صوبے میں جپسم سمیت دیگر اہم معدنیات کا پوٹینشیل موجود ہے جسے ایکسپلور کرنے کی ضرورت ہے۔

انہوں نے کہا کہ صوبائی حکومت نے معدنی وسائل کی بہترین مینجمنٹ اور ایکسپلوریشن کے لیے اپنی مائننگ کمپنی بنا لی ہے۔انہوں نے کہا کہ صوبے میں مائننگ کے لیے جدید مشینری اور طریقہ کار متعارف کرانے پر کام کر رہے ہیں ، صوبائی حکومت معدنی مصنوعات کی صوبے میں ہی ویلیو ایڈیشن کے لیے اقدامات کر رہی ہے، اس سلسلے میں سرمایہ کاروں کو ہر ممکن تعاون فراہم کیا جائے گا۔

انہوں نے کہا کہ صوبائی حکومت معدنیات کی بہترین مینجمنٹ کے ذریعے ہی صوبائی آمدن میں اضافہ کر رہی ہے، وزیر اعلیٰ نے وفد کو صوبائی ٹرانسمیشن لائن کی تعمیر میں بھی سرمایہ کاری کی دعوت دی۔وزیر اعلی نے کہا کہ حکومت مقامی بجلی گھروں سے پیدا ہونے والی بجلی صوبائی ٹرانسمیشن لائن کے ذریعے صنعتوں کو رعائتی نرخوں پر فراہم کرے گی۔علی امین گنڈاپور نے کہا کہ صوبے میں بے روزگاری کے خاتمے کے لیے صنعتی شعبے کی ترقی نہایت ضروری ہے، صوبائی حکومت اس مقصد کے لیے سرمایہ کاروں کو ہر ممکن سہولیات اور تعاون فراہم کر رہی ہے۔

وفد نے وزیر اعلیٰ کی مائننگ اور ٹرانسمیشن لائن کی تعمیر میں سرمایہ کاری کی دعوت کا خیر مقدم کیا اورخیبر پختونخوا میں مزید سرمایہ کاری میں دلچسپی کا بھی اظہار کیا ہے ۔