Live Updates

حج کے رکن اعظم وقوف عرفہ کی ادائیگی، خطبہ حج 35 زبانوں میں نشر کیا گیا

جمعرات 5 جون 2025 22:22

میدان عرفات (اُردو پوائنٹ اخبارتازہ ترین - اے پی پی۔ 05 جون2025ء) پاکستان سمیت دنیا بھر سے لاکھوں عازمین حج نے جمعرات کولبیک اللہ اللھم لبیک کی صدائوں کے ساتھ حج کا رکن اعظم وقوف عرفہ ادا کیا ۔سخت موسمی حالات کے پیش نظر سعودی حکومت کی جانب سے جاری کردہ ہدایات پر عمل کرتے ہوئے حجاج کرام نے مسجد نمرہ سے اپنے خیموں میں خطبہ حج سنا۔ امسال خطبہ حج 35 زبانوں میں نشر کیا گیا اور عالمی سطح پر رسائی کو یقینی بناتے ہوئے مختلف سوشل میڈیا پلیٹ فارمز پر ڈیجیٹل طور پر نشر کیا گیا ۔

غروب آفتاب کے بعد حجاج کرام مزدلفہ کے لیے روانہ ہوتے ہیں جہاں وہ مغرب اور عشاء کی نمازیں ایک ساتھ ادا کرتے ہیں اور رات کھلے آسمان تلے گزارتے ہیں۔حجاج کرام مزدلفہ سے کنکریاں بھی جمع کرتے ہیں تاکہ رمی جمرات کے دوران شیطان کو کنکریاں مارتے ہیں ۔

(جاری ہے)

مزدلفہ میں نماز فجر کی ادائیگی کے بعد حجاج مناسک حج کے لیے منیٰ روانہ ہوں گے۔مکہ مکرمہ میں پاکستان حج مشن نے تازہ ترین سعودی ہدایات پر عمل کرتے ہوئے ’رمی الجمارات‘ اور جانوروں کی قربانی کے لیے مخصوص رہنما خطوط کا اعلان کیا ہے،ہر مکتب نے 10 ذی الحجہ کو ’’رمی‘‘ کے لیے اوقات مقرر کیے ہیں اور ہر ناظم کو یقینی بنانا چاہیے کہ عازمین حج اپنی مختص جگہ کے مطابق رسم ادا کریں۔

حجاج کرام کو مشورہ دیا جاتا ہے کہ وہ اپنے ناظم کی نگرانی میں گروپس میں آگے بڑھیں۔حجاج 11 ذوالحجہ کو فجر کی نماز کے بعد ’’حلق ‘‘(سر منڈوانے) یا قصر (بال چھوٹے کرنے) کے بعد حالت احرام سے باہر نکلتےہیں۔سعودی حکام نے پاکستانی حجاج کی قربانی کا وقت 10 اور 11 ذی الحجہ کی درمیانی شب 12:30 بجے مقرر کیا ہے۔ حجاج کرام کو پہلے دن کی ’’رمی‘‘ آدھی رات سے پہلے مکمل کرنی چاہیے۔

ڈائریکٹر جنرل حج عبدالوہاب سومرو نے ’’اے پی پی‘‘ کو بتایا کہ پاکستانی عازمین حج کے لیے جامع سہولیات کا انتظام کیا گیا ہے،اس وقت 73 فیصد پاکستانی عازمین منیٰ سے ٹرین کے ذریعے سفر کر چکے ہیں جبکہ بقیہ بسوں کے ذریعے عرفات پہنچے ہیں،حجاج کی بہبود کو یقینی بنانے کے لیے تقریباً 400 میڈیکل اور پیرامیڈیکل افسران کو مختلف صحت کے مراکز میں تعینات کیا گیا ہے،ان میں مکہ مکرمہ میں ایک مکمل لیس ہسپتال اور 9 ڈسپنسریاں، مدینہ منورہ میں ایک ہسپتال اور 2 ڈسپنسریاں شامل ہیں۔انہوں نے کہا کہ صحت کی دیکھ بھال کا وسیع نیٹ ورک چوبیس گھنٹے ہنگامی دیکھ بھال اور معمول کی طبی خدمات فراہم کرتا ہے۔