قائداعظم کے وژن کی روشنی میں پاکستان کو مضبوط بنائیں کی: سعدیہ راشد

لاہور (اُردو پوائنٹ اخبارتازہ ترین - آن لائن۔ 05 جون2025ء) ہمدرد فاؤنڈیشن پاکستان کی صدر سعدیہ راشد نے کہا ہے کہ پاکستان کے خلاف اندرونی و بیرونی سازشوں کے باوجود ہمارا ایمان، اتحاد اور قربانی کا جذبہ ہی ہماری سب سے بڑی طاقت ہے۔ ان خیالات کا اظہار انہوں نے قول قائد اعظم ''دنیا کی کوئی طاقت پاکستان کو مٹا نہیں سکتی'' کے موضوع پر شوریٰ ہمدرد کے اجلاس سے اپنے ایک خصوصی پیغام میں کیا انہوں نے کہا کہ قائداعظم نے قیام پاکستان کے بعد جس اعتماد، یقین اور حوصلے کے ساتھ دشمنوں کو خبردار کیا تھا، وہ آج بھی ہماری رہنمائی کے لیے مشعل راہ ہے۔

اُن کے تاریخی الفاظ ’’There is no power on earth that can undo Pakistan‘‘ آج بھی ہمارے ایمان کی بنیاد ہیں۔سعدیہ راشد نے مزید کہا کہ حالیہ عالمی منظرنامے اور دشمن کی چالوں کے باوجودآج پاکستان ایک ایٹمی طاقت ہے جس کی فوج دنیا کی بہترین افواج میں شمار ہوتی ہے۔

(جاری ہے)

اس کا اعتراف دنیا کے عسکری تجزیہ کار بھی کرتے ہیں۔ انہوں کا کہنا تھا کہ پاکستان کی سالمیت اور خودمختاری کے لیے افواج پاکستان، ایجنسیاں اور سویلین ادارے ہر وقت تیار ہیں اور دشمن کے ہر منصوبے کو ناکام بنانے کی مکمل صلاحیت رکھتے ہیں۔

انہوں نے کہا کہ بھارت اور اس کے حمایتی عناصر پاکستان کو عدم استحکام کا شکار کرنے کی سازشیں کر رہے ہیں، جنہیں ہر سطح پر بے نقاب کرنے اور قوم کو باخبر رکھنے کی ضرورت ہے۔ سعدیہ راشد نے کہا کہ ہمدرد فاؤنڈیشن پاکستان، قومی شعور بیدار کرنے اور نئی نسل کو تاریخ سے روشناس کرانے کے لیے اپنی فکری نشستوں کا سلسلہ جاری رکھے گی۔آخر میں انہوں نے کہا کہ ہمیں اپنے اندر یقین، اتحاد اور قربانی کا جذبہ مزید پختہ کرنے کی ضرورت ہے تاکہ پاکستان کو قائداعظم کے خوابوں کے مطابق ایک مضبوط، خوشحال اور باوقار ریاست بنایا جا سکے۔

اجلاس میں وائس ایئر مارشل ریٹائرڈ انور محمود خان برگیڈیئر ریٹائرڈ طارق خلیل سید محمد حسن نے بطور خاص شرکت کی جبکہ محترمہ جسٹس ناصرہ اقبال میں قیوم نظامی ڈاکٹر میاں محمد اکرم احمد اویس پروفیسر راشد حمید کلیامی رانا امیر احمد خان پروفیسرنصیر اے چوہدری جناب شاہد علی خان ونگ کمانڈر ظفر اقبال سکوارڈن لیڈر چوہدری صابر حسین ڈاکٹر ذرقان نسیم غالب ڈاکٹر کنول فیروز ندیم شہزاد علی، انجینیئر محمد اصف ثروت رشید، ڈاکٹر پروین خان، قاری خالد محمود، اصغر علی کھوکھر، ایم ار شاہد، انوار قمر جناب توفیق سیفی اور عثمان غنی شریک ہوئے۔