Live Updates

بیلاروس کے دفاعی وفد کا ایئر ہیڈکوارٹرز کا دورہ، ایئر چیف سے ملاقات،دیرینہ دوطرفہ تعلقات کو مزید مضبوط بنانے کے عزم کا اعادہ

دونوں فضائی افواج کے درمیان تعاون بڑھانے اور پیشہ ورانہ ترقی کیلئے اعلیٰ سطح تبادلہ پروگرامز کے آغاز پر اتفاق کیا گیا ، آئی ایس پی آر

جمعرات 5 جون 2025 20:20

اسلام آباد (اُردو پوائنٹ اخبارتازہ ترین - این این آئی۔ 05 جون2025ء)بیلاروس کے ایک اعلیٰ سطح کے دفاعی وفد نے میجر جنرل آندرے یولیانووچ کی زیرقیادت جمعرات کو ایئر ہیڈ کوارٹرز اسلام آباد کا دورہ کیا اور پاک فضائیہ کے سربراہ ایئر چیف مارشل ظہیر الدین بابر سدھو سے ملاقات کی۔ مسلح افواج کے شعبہ تعلقات عامہ (آئی ایس پی آر) کے مطابق ملاقات میں فضائی طاقت اور عسکری تعاون سے متعلق باہمی دلچسپی کے امور پر تبادلہ خیال کیا گیا اور دونوں ممالک کے درمیان دیرینہ دوطرفہ تعلقات کو مزید مضبوط بنانے کے عزم کا اعادہ بھی کیا۔

آئی ایس پی آر کے مطابق دونوں فضائی افواج کے درمیان قریبی اور مستقل رابطے کو برقرار رکھنے پر اتفاق کیا گیا، میجر جنرل آندرے یولیانووچ کی آمد پر پاکستان ایئر فورس کے چاق و چوبند دستے نے گارڈ آف آنر پیش کیا۔

(جاری ہے)

آئی ایس پی آر کے مطابق پاک فضائیہ کے سربراہ نے دونوں ممالک کے درمیان مضبوط عسکری تعلقات کو اجاگر کیا، پاک فضائیہ بیلاروس ایئر فورس کی استعداد کار بڑھانے، پائلٹس اور مینٹیننس کے عملے کی تربیت کیلئے تعاون فراہم کرے گی۔

آئی ایس پی آر کے مطابق ملاقات میں دوطرفہ فضائی افواج کے تعلقات کو مزید مضبوط بنانے کے عزم کا اعادہ کیا گیا۔ آئی ایس پی آر کے مطابق تربیت، ٹیکنالوجی کی ترقی اور عملی صلاحیت کے شعبوں میں تعاون بڑھانے پر زور دیا گیا، دونوں فضائی افواج کے درمیان تعاون بڑھانے اور پیشہ ورانہ ترقی کیلئے اعلیٰ سطح تبادلہ پروگرامز کے آغاز پر اتفاق کیا گیا۔

آئی ایس پی آر کے مطابق میجر جنرل آندرے یولیانووچ نے پرتپاک مہمان نوازی پر دلی شکریہ ادا کیا، میجر جنرل آندرے یولیانووچ نے پاکستان اور بیلاروس کے درمیان دیرینہ دوستی کو سراہا۔ آئی ایس پی آر کے مطابق میجر جنرل آندرے یولیانووچ نے کہا پاکستان ایئر فورس کے وسیع تجربے سے سیکھنا چاہتے ہیں۔ انھوں نے پی اے ایف کے تربیتی نظام سے استفادہ کرنے کی خواہش کا بھی اظہار کیا۔ آئی ایس پی آر کے مطابق میجر جنرل آندرے یولیانووچ نے پاک فضائیہ کے سربراہ کو بیلاروس میں دفاعی ایونٹس میں شرکت کی دعوت دی۔ فریقین نے اس دورے کی تفصیلات پر کام کرنے پر اتفاق کیا، میجر جنرل آندرے یولیانووچ کا دورہ دونوں ممالک میں عسکری شراکت داری کا عکاس ہے۔