Live Updates

ایمان کی روشنی، نابینا پاکستانی حاجی کا نصف صدی پر محیط خواب حج2025 میں پورا ہو گیا

جمعرات 5 جون 2025 21:20

منیٰ (اُردو پوائنٹ اخبارتازہ ترین - اے پی پی۔ 05 جون2025ء) منیٰ کے خیموں میں لاکھوں حجاج کرام موجود ہیں، لیکن ان میں سے ایک چہرہ سب کی توجہ کا مرکز بن گیا ہے — 63 سالہ پاکستانی حاجی حبیب اللہ، جنہوں نے بصارت سے محروم ہونے کے باوجود عمر بھر حج کا خواب نہ صرف دیکھا بلکہ اسے اپنے غیر متزلزل ایمان اور علم کی روشنی سے پورا بھی کر لیا۔حبیب اللہ 18 برس کی عمر میں بینائی کھو بیٹھے، مگر مایوسی کو خود پر غالب نہ ہونے دیا۔

انہوں نے پاکستان میں اسلامی فقہ کی تدریس کے ساتھ ساتھ بریل رسم الخط میں مکمل قرآن مجید حفظ کیا۔ آج وہ مقدس سرزمین پر موجود ہیں، جہاں وہ اپنے خواب کی تعبیر کو دل کی آنکھوں سے محسوس کر رہے ہیں۔سعودی پریس ایجنسی سے گفتگو کرتے ہوئے ان کا کہنا تھا کہ میں کعبہ کو اپنی آنکھوں سے نہیں دیکھ سکتا، لیکن میرا دل اس کے وجود سے لبریز ہے۔

(جاری ہے)

یہ حج میرے لیے ایک خواب کی تعبیر ہے جو نصف صدی سے میری دعاؤں کا حصہ تھا۔

انہوں نے مزید کہا کہ علم اور تعلیم روشنی ہیں، اصل اندھیرا بصارت نہ ہونا نہیں بلکہ علم کا نہ ہونا ہے۔حبیب اللہ کی زندگی اور ان کا حج کا سفر اس بات کا بین ثبوت ہے کہ اللہ پر یقین، علم کا جذبہ اور صبر و استقامت انسان کو وہ مقام عطا کرتے ہیں جو بظاہر ممکن نہیں لگتا۔ انہوں نے کہا میں وہی نابینا بچہ ہوں، جو آج اللہ کا مہمان ہے، کامیاب اور مطمئن۔ الحمدللہ!"حبیب اللہ کی داستان حج کے روحانی پہلو کی ایک روشن مثال ہے، جو دنیا بھر کے مسلمانوں کے لیے حوصلہ، امید اور ایمان کا پیغام لیے ہوئے ہے