متحدہ عرب امارات اور مصر کا غزہ میں جنگ بندی اور دو ریاستی حل کا مطالبہ

جمعہ 6 جون 2025 11:00

ابو ظہبی (اُردو پوائنٹ اخبارتازہ ترین - اے پی پی۔ 06 جون2025ء) متحدہ عرب امارات اور مصر نے غزہ میں جنگ بندی کے لیے کوششیں تیز کرنے اور دو ریاستی حل کی بنیاد پر ایک واضح سیاسی افق تلاش کرنے کی ضرورت پر زور دیتے ہوئے کہا کہ یہ ایسا حل ہو جو سب کے لیے استحکام اور سلامتی کو یقینی بنائے۔العربیہ اردو کے مطابق متحدہ عرب امارات کے صدر شیخ محمد بن زاید اور مصر کے صدر عبد الفتاح السیسی نے خطے کی تازہ ترین صورتحال اور اس کی سلامتی و استحکام کی بحالی کے طریقوں پر تبادلہ خیال کیا۔

ملاقات کے دوران انہوں نے یو اے ای اور مصر کے درمیان باہمی مفادات کی تکمیل اور خطے کی ترقی و خوشحالی کے لیے استحکام، سلامتی اور امن کو فروغ دینے کے لیے مشاورت اور ہم آہنگی جاری رکھنے کی مشترکہ اہمیت پر زور دیا۔

(جاری ہے)

مصری صدارتی بیان کے مطابق ملاقات میں علاقائی صورتحال اور خطے میں سلامتی و استحکام کی بحالی کے طریقوں پر بھی تبادلہ خیال کیا گیا۔

فریقین نے اس بات پر بھی زور دیا کہ غزہ کے عوام کو مشکل انسانی صورتحال سے بچانے کے لیے انسانی امداد کو بلا روک ٹوک ضروری مقدار میں داخل کیا جائے۔ انہوں نے دو ریاستی حل کے حصول کے لیے کوششیں جاری رکھنے کی ضرورت پر بھی زور دیا۔اپنی طرف سے شیخ محمد بن زاید نے بحران کے آغاز سے لے کر اب تک مصر کی مسلسل کوششوں کو سراہا، خواہ وہ غزہ میں جنگ بندی کے معاہدے تک پہنچنے اور غزہ کے عوام کی حفاظت کے لیے ثالثی کے فریم ورک میں ہو یا ان کی انسانی تکالیف کو کم کرنے کی کوشش میں ہو۔

مصری صدارت کے سرکاری ترجمان سفیر محمد الشناوی نے کہا کہ ملاقات میں لبنان، شام، سوڈان، لیبیا، یمن اور صومالیہ کی صورتحال اور مجموعی علاقائی صورتحال پر بھی بات چیت کی گئی، دونوں رہنماؤں نے ان برادر ممالک کی سلامتی اور خودمختاری کے تحفظ کی اہمیت پر زور دیا تاکہ ان کے عوام کے استحکام اور خوشحالی کی خواہشات پوری ہو سکیں۔