Live Updates

اسرائیل کے حزب اللہ پر فضائی حملے، 20 سے زائد مقامات نشانہ

ان حملوں کا مقصد حزب اللہ کو دوبارہ منظم ہونے سے روکنا ہے،اسرائیلی فوج

جمعہ 6 جون 2025 12:49

تل ابیب (اُردو پوائنٹ اخبارتازہ ترین - این این آئی۔ 06 جون2025ء)اسرائیلی فوج نے لبنان کے دارالحکومت بیروت کے جنوبی علاقے میں حزب اللہ کے متعدد ٹھکانوں پر شدید فضائی حملے کیے، جن میں دعوی کیا گیا کہ وہ ٹھکانے ڈرون بنانے کے لیے استعمال ہونے والی زیر زمین تنصیبات پر مشتمل تھے۔ اس کارروائی کے بعد علاقے میں شدید خوف و ہراس پھیل گیا اور مقامی آبادی کے انخلا کا سلسلہ شروع ہو گیا۔

(جاری ہے)

عرب ٹی وی کے مطابق یہ حملے الحدث اور حارہ حری کے درمیانی علاقے میں چار مختلف مقامات پر کیے گئے۔ اسرائیل کی جانب سے مجموعی طور پر 20 سے زائد فضائی حملے کیے گئے، جن میں سے 16 ڈرون کے ذریعے اور 5 لڑاکا طیاروں کی مدد سے انجام دیے گئے۔ ان حملوں کا دائرہ جنوبی بیروت سے لے کر عین قانا تک پھیلا ہوا تھا۔اسرائیلی حکام کے مطابق ان حملوں کا مقصد حزب اللہ کو دوبارہ منظم ہونے سے روکنا ہے، جس کی قیادت اور عسکری صلاحیتیں حالیہ جنگ میں شدید متاثر ہوئی ہیں۔ اسرائیلی فوج نے تصدیق کی ہے کہ یہ کارروائیاں خاص طور پر حزب اللہ کی یونٹ 127 کے خلاف کی گئی ہیں۔