لانڈھی ایکسپورٹ پراسیسنگ زون میں آتشزدگی، 30 گھنٹے بعد بھی آگ پر قابو پانے میں ناکام

افسوسناک واقعہ ہفتے کی رات 3 بجے پیش آیا آگ لگنے کے نتیجے میں بھاری مالیت کا سامان خاکستر ہوگیا

ساجد علی پیر 9 جون 2025 11:04

لانڈھی ایکسپورٹ پراسیسنگ زون میں آتشزدگی، 30 گھنٹے بعد بھی آگ پر قابو ..

کراچی ( اُردو پوائنٹ اخبارتازہ ترین۔ 09 جون 2025ء ) صوبہ سندھ کے دارالحکومت کراچی کے لانڈھی ایکسپورٹ پراسیسنگ زون میں لگی آگ پر 30 گھنٹوں سے زائد کا وقت گزرنے کے بعد بھی مکمل طور پر قابو نہیں پایا جاسکا۔ تفصیلات کے مطابق شہرقائد میں واقع لانڈھی ایکسپورٹ پراسیسنگ زون میں خوفناک آتشزدگی کے نتیجے میں 3 فیکٹریاں جل کر تباہ ہوگئیں، چوتھی فیکٹری میں لگی آگ پر قابو پانے کی کوششیں جاری ہیں، آتشزدگی کے نتیجے میں 5 افراد زخمی ہوگئے۔

فائر بریگیڈ حکام نے بتایا کہ شعلوں کو بڑھنے سے روک دیا گیا ہے جس سے آگ پھیلنے کا خطرہ نہیں، فائر بریگیڈ کی 12 گاڑیاں اس وقت بھی آگ بجھانے کی کارروائی میں حصہ لے رہی ہیں، تینوں فیکٹریوں میں مختلف حصوں میں آگ لگی ہوئی ہے، فیکٹریوں کے اندر جانے کے راستے بند ہیں جس کی وجہ سے آگ بجھانے میں مشکلات ہیں۔

(جاری ہے)

بتایا گیا ہے کہ آتشزدگی کا یہ واقعہ ہفتے کی رات 3 بجے پیش آیا آگ کو تیسرے درجے کی قرار دیا گیا تھا، آتشزدگی کے نتیجے میں بھاری مالیت کا سامان خاکستر ہوگیا، تینوں فیکٹریوں کی عمارتوں کو بھی مخدوش قرار دیا گیا، فیکٹری کا ایک حصہ گرنے سے 5 افراد بھی زخمی ہوئے جن میں کے ایم سی کے فائر فائٹرز موجود تھے، بڑے پیمانے پر آتشدگی کے باعث کولنگ کا عمل کئی گھنٹوں پر محیط ہوسکتا ہے۔

چیف فائر آفیسر نے بتایا کہ ابتدائی طور پر لانڈھی ایکسپورٹ پراسیسنگ زون میں واقع ایک فیکٹری میں آگ بھڑک اٹھی تھی، واقعے کی اطلاع فوری طور پر سینٹرل کمانڈ اینڈ کنٹرول ریسکیو 1122 سندھ کو اطلاع موصول ہوئی جس پر ریسکیو 1122 کی فائر اینڈ ریسکیو ٹیم فوری طور پر جائے وقوعہ پر پہنچ گئی، مجموعی طور پر ریسکیو 1122 اور کے ایم سی کے 11 فائر ٹینڈر، 1 سنارکل اور 2 ایمبولینس جائے وقوعہ پر پہنچیں تاہم دھوئیں کی شدت اور پانی کی کمی ہونے کے باعث ریسکیو آپریشن میں مشکلات کا سامنا کرنا پڑا۔

ریسکیو 1122 کے چیف آپریٹنگ آفیسر (سی او او) ڈاکٹر عابد جلال الدین شیخ کا کہنا ہے کہ اتوار کو علی الصبح فیکٹری میں لگنے والی آگ نے آتشگیر مواد کی وجہ سے دیگر فیکٹریوں کو بھی لپیٹ میں لیا، آتشزدگی کے نتیجے میں 3 فیکٹریاں جل کر مکمل تباہ ہوگئیں، چوتھی فیکٹری میں آگ بھجانے کا عمل جاری ہے، 20 سے زائد فائر ٹینڈر آگ بھجانے میں مصروف ہیں، آتشزدگی کے باعث 5 افراد زخمی ہوگئے جنہں ہسپتال منتقل کر دیا گیا۔