ایل ڈبلیو ایم سی نے عید قربان پر 88 ہزار 927 ٹن ویسٹ ٹھکانے لگایا

پیر 9 جون 2025 20:40

لاہور (اُردو پوائنٹ اخبارتازہ ترین - اے پی پی۔ 09 جون2025ء) لاہور ویسٹ مینجمنٹ کمپنی نے عید قربان پر ڈویژن سے 88 ہزار 927 ٹن ویسٹ ٹھکانے لگایا ۔ایل ڈبلیو ایم سی نےلگاتار 72 گھنٹے کام جاری رکھ کر لاہور کے ساتھ قصور، شیخوپورہ، ننکانہ صاحب میں بھی صفائی کے نئے ریکارڈ قائم کر دیئے۔لاہور سے 54 ہزار 888 ٹن، شیخوپورہ سے 15 ہزار 543 ٹن، قصور سے 12 ہزار 66 ٹن، جبکہ ننکانہ صاحب سے 6 ہزار 430 ٹن آلائشیں اور جانوروں کی باقیات ٹھکانے لگائی گئیں۔

عید قربان کے تینوں روز سوشل میڈیا اور ہیلپ لائن1139پر موصول ہونے والی لاہور ڈویژن کی 20 ہزار 268 شکایات کا فوری طور پر ازالہ یقینی بنایا گیا۔لاہور میں 16 ہزار 664،شیخوپورہ میں 1974، قصور سے 1268، جبکہ ننکانہ صاحب سے 362 شہریوں نے ہیلپ لائن 1139، ستھرا پنجاب ایپلیکیشن اور سوشل میڈیا پر رابطہ کیا۔

(جاری ہے)

خصوصی صفائی اقدامات کے تحت آلائشوں کو ندی نالوں، نہروں میں بہانے والوں کے خلاف سیف سٹی اور ڈرون کیمروں سے مانیٹرنگ کا سلسلہ تینوں روز جاری رہا۔

خلاف ورزی کرنے والوں کے خلاف 20 ایف آئی آر کا اندراج، 3 گاڑیاں قبضے میں لی گئیں، 3 لاکھ سے زائد کے جرمانے بھی کئے گئے،اس سال عید قربان پر آلائشوں کو ماحول دوست طریقے سے ٹھکانے لگانے کیلئے لاہور ڈویژن میں 24 لاکھ بائیو ڈی گریڈایبل بیگز تقسیم کئے گئے۔لاہور ڈویژن میں 651 سروس ڈلیوری کیمپس، 254 عارضی کولیکشن پوائنٹس، اور 34 ڈمپ سائٹس قائم کی گئی۔

لاہور ڈویژن میں 24 ہزار سے زائد سینٹری ہیروز,5ہزار سے زائد مشینری نے تینوں شفٹوں میں کام کر کے ستھرا پنجاب پروگرام کو کامیاب بنایا۔سی ای او ایل ڈبلیو ایم سی بابر صاحب دین کا عیدگرینڈ صفائی آپریشن کے حوالے سے کہنا ہے کہ وزیر اعلی پنجاب مریم نواز کے وژن کے مطابق اس عید قربان پر لاہور ڈویژن کو آلائشوں اور تعفن سے پاک بنانے میں شہریوں کا کردار قابل ستائش ہے۔عید قربان پر صفائی ٹیموں سے تعاون یقینی بنانے پر شہریوں کے مشکور ہیں۔ایل ڈبلیو ایم سی افسران اور ورکرز چاند رات سے عید کے تینوں دن فیلڈ میں موجود رہے۔ شہریوں کو صاف ستھرا تعفن سے پاک ماحول فراہم کرنے کا عزم کامیابی سی پورا ہوا۔