بجٹ اجلاس 27جون تک جاری رہے گا،بجٹ کی منظوری 26جون کو ہوگی،بزنس ایڈوائزری کمیٹی کا فیصلہ

منگل 10 جون 2025 21:45

اسلام آباد(اُردو پوائنٹ اخبارتازہ ترین - آن لائن۔ 10 جون2025ء)قومی اسمبلی کی ہاؤس بزنس ایڈوائزری کمیٹی میں فیصلہ کیا گیا ہے کہ بجٹ اجلاس 27جون تک جاری رہے گا،بجٹ پر بحث13جون کو شروع ہوگی،بحث 21 جون تک جاری رہے گی اور26 جون کو فنانس بل کی قومی اسمبلی سے منظوری ہوگی ۔قومی اسمبلی کی ہاؤس بزنس ایڈوائزری کمیٹی کا اجلاس اسپیکر قومی اسمبلی سردار ایاز صادق کی صدارت میں منعقد ہوا۔

اجلاس میں قومی اسمبلی کے سترویں اجلاس برائے وفاقی بجٹ کے ایجنڈے اور دورانیے پر تبادلہ خیال کیا گیااورکمیٹی اجلاس میں قومی اسمبلی کے بجٹ اجلاس کو 27 جون 2025 تک جاری رکھنے کا فیصلہ کیا گیا۔وفاقی بجٹ 2025-26 دس جون کو قومی اسمبلی میں پیش کیا جائے گا۔سپیکر قومی اسمبلی سردار ایاز صادق نے کہا کہ 11 اور 12 جون کو قومی اسمبلی کا اجلاس نہیں ہوگا،13 جون کو قومی اسمبلی میں وفاقی بجٹ پر بحث کا آغاز ہوگا۔

(جاری ہے)

قومی اسمبلی میں موجود پارلیمانی جماعتوں کو قواعد و ضوابط کے مطابق بحث کیلئے وقت دیا جائے گا۔وفاقی بجٹ پر بحث 21 جون تک جاری رہے گی۔سپیکر قومی اسمبلی سردار ایاز صادق نے کہا کہ وفاقی بجٹ 2025-26 پر بحث 21 جون کو سمیٹی جائے گی،22 جون کو قومی اسمبلی کا اجلاس نہیں ہو گا۔23 جون کو قومی اسمبلی میں 2025- 26 کے مختص کردہ ضروری اخراجات پر بحث ہوگی۔سردار ایاز صادق نے کہا کہ 24 اور 25 جون کو ڈیمانڈز،گرانٹس،کٹوتی کی تحاریک پر بحث اور ووٹنگ ہوگی،26 جون کو فنانس بل کی قومی اسمبلی سے منظوری ہوگی ۔

27 جون کوضمنی گرانٹس سمیت دیگر امور پر بحث اور ووٹنگ ہوگی۔کمیٹی اجلاس میں ڈپٹی اسپیکر قومی اسمبلی سید غلام مصطفیٰ شاہ، اعظم نذیر تارڈ،طارق فضل چوہدری، شیخ آفتاب، اور ممبران قومی اسمبلی، محترمہ شہلا رضا،اعجاز حسین جاکھرانی، ملک عامر ڈوگر،، نور عالم خان، سید امین الحق، محترمہ شازیہ عطاء مری، ملک عامر ڈوگر، محترمہ زرتاج گل، گل اصغر خان، ریاض فتیانہ، علی محمد خان نے شرکت کی۔