Live Updates

کل جماعتی حریت کانفرنس کا مقبوضہ جموں وکشمیرمیں بڑے پیمانے پر بھارتی فوجیوں کی تعیناتی پر اظہار تشویش

منگل 10 جون 2025 22:40

سرینگر (اُردو پوائنٹ اخبارتازہ ترین - اے پی پی۔ 10 جون2025ء) کل جماعتی حریت کانفرنس نے غیرقانونی طورپر بھارت کے زیر قبضہ جموں وکشمیرمیں بڑے پیمانے پر بھارتی فوجیوں کی تعیناتی پرسخت تشویش کا اظہار کرتے ہوئے کہاہے کہ مقبوضہ علاقے کو ایک کھلی جیل میں تبدیل کردیاگیا ہے۔

(جاری ہے)

کشمیرمیڈیاسروس کے مطابق کل جماعتی حریت کانفرنس کے ترجمان ایڈووکیٹ عبدالرشید منہاس نے سرینگر میں جاری ایک بیان میں کہا کہ بھارتی فوجیوں کی مسلسل تعیناتی کے باعث لوگ خوف و دہشت کے ماحول میں زندگی گزارنے پر مجبور ہیں کیونکہ وہ ہر گلی اور محلے کی نگرانی کررہے ہیں۔

انہوں نے کہاکہ تقریبا 10 لاکھ بھارتی فوجی مقبوضہ علاقے میں تعینات ہیں اور اس طرح ہر سات شہریوں پر ایک قابض فوجی پہرہ دے رہا ہے جس کی مثال دنیا میں کہیں نہیں ملتی۔ ایڈووکیٹ منہاس نے اقوام متحدہ اور انسانی حقوق کی عالمی تنظیموں سمیت عالمی برادری پر زور دیا کہ وہ اپنی خاموشی توڑ کرمتنازعہ علاقے میں منظم انداز میں فو جی مظالم اورآبادی کے تناسب میں تبدیلی پر بھارت کو جوابدہ ٹھہرائیں۔