Live Updates

پاکستان کی یورپی برآمدات میں قابلِ ذکر اضافے سے ملکی معیشت مستحکم‘سٹیٹ بینک

برآمدات میں اس قابل ذکر اضافہ ایس آئی ایف سی کی سہولت کاری اور مؤثر پالیسی اقدامات کا نتیجہ قرار

بدھ 11 جون 2025 13:13

کراچی(اُردو پوائنٹ اخبارتازہ ترین - این این آئی۔ 11 جون2025ء)مالی سال 2024-25 کے دوران پاکستان کی یورپی ممالک کو برآمدات میں نمایاں بہتری دیکھنے میں آئی ہے، جس سے معیشت کو استحکام اور ترقی کی نئی راہیں کھلی ہیں۔اسٹیٹ بینک آف پاکستان کے اعدادوشمار کے مطابق جولائی سے اپریل تک کے عرصے میں پاکستان کی یورپی برآمدات میں 8.6 فیصد اضافہ ریکارڈ کیا گیا، جو گزشتہ مالی سال کے 6.95 ارب ڈالر کے مقابلے میں بڑھ کر 7.55 ارب ڈالر تک پہنچ گئیں۔

برآمدات میں اس قابل ذکر اضافے کو اسپیشل انویسٹمنٹ فیسلٹیشن کونسل (ایس آئی ایف سی) کی سہولت کاری اور مؤثر پالیسی اقدامات کا نتیجہ قرار دیا جا رہا ہے، جس نے پاکستانی مصنوعات، خصوصاً ٹیکسٹائل اور ملبوسات کو یورپی منڈیوں تک رسائی میں آسانی فراہم کی۔

(جاری ہے)

ٹیکسٹائل اور گارمنٹس کے شعبے میں بڑھتی ہوئی مانگ نے نہ صرف برآمدات کو سہارا دیا بلکہ ملکی صنعتوں، سرمایہ کاری اور محاصل میں بھی نمایاں اضافہ کیا۔

ایس آئی ایف سی کے فعال کردار نے یورپی منڈیوں میں پاکستانی اشیا کی موجودگی کو مستحکم کیا ہے، جس کے نتیجے میں نہ صرف قلیل مدتی تجارتی فوائد حاصل ہوئے بلکہ طویل مدتی معاشی ترقی کے امکانات بھی روشن ہوئے ہیں۔معاشی ماہرین کا کہنا ہے کہ برآمدات میں یہ بہتری پاکستان کی معیشت کے لیے مثبت اشارہ ہے، جو روزگار کے مواقع، زرمبادلہ کے ذخائر اور سرمایہ کاروں کے اعتماد میں اضافے کا باعث بنے گا۔