آزاد کشمیر میں چیف الیکشن کمشنر تعینات نہ ہو سکا،آمدہ الیکشن بروقت نہ ہونے کا خدشہ

بدھ 11 جون 2025 16:22

مظفرآباد (اُردو پوائنٹ اخبارتازہ ترین - این این آئی۔ 11 جون2025ء)مرکزی سیکرٹری اطلاعات ونشریات مسلم لیگ ن یوتھ ونگ آزاد جموں وکشمیر شرافت علی خلجی نے کہا ہے کہ ریاست کے اندر اس وقت سب سے بڑا آئینی عہدہ چیف الیکشن کمشنر نہ ہونے کی وجہ سے آمدہ الیکشن بروقت ہونے میں خدشہ نظر آ رہا ہے اگر انتخابات عین وقت پر نہ ہوئے تو آزاد جموں وکشمیر میں افراتفری کا ماحول پیدا ہو سکتا ہے ان خیالات کا اظہار انھوں نے گذشتہ روز میڈیا سے گفتگو کرتے ہوئے کیا انھوں نے کہا کہ چیف الیکشن کمشنر کے عہدے کے علاوہ چیئرمین پبلک سروس کمیشن،چیئرمین احتساب بیورو،ڈائریکٹر جنرل اینٹی کرپشن،ڈائریکٹر جنرل کشمیر انسٹیٹیوٹ آف مینجمنٹ،محتسب اعلیٰ،چیئرمین پبلک اکاؤنٹس کمیٹی،سمیت خالی آسامیوں کو خالی رکھ کر حکومت آزادکشمیر ریاستی اداروں کے ساتھ کھلواڑ کر رہی ہے۔

(جاری ہے)

انھوں نے کہا کہ حکومت آزادکشمیر فی الفور اپنی عیاشیاں ختم کرتے ہوئے ریاست کے اندر خالی آئینی عہدوں پر تعیناتیاں کر کے عوام کے لئے آسانیاں پیدا کرے اگر حکومت آزادکشمیر نے جلد از جلد ان عہدوں پر تقرریاں نہ کی تو عوام سڑکوں پر نکلیں گے اور اس حکومت کی ناقص پالیسیاں اس کو لے ڈوبے گی۔انھوں نے کہا کہ اس وقت آزادکشمیر کے اندر ریاستی اداروں کو یرغمال بنایا ہوا ہے عوام کئی ماہ سے اس مناظر کو برداشت کئے ہوئے ہیں اگر وزیراعظم آزادکشمیر نے ہوش کے ناخن نہ لئے تو عوام ان کا چٹا کھٹا کھول کر رکھ دے گی۔