سعودی عرب میں عمرہ سیزن 1447 ہجری کا آغاز

عمرہ پرمٹ نسک ایپلی کیشن کے ذریعے جاری کیے جائیں گے

بدھ 11 جون 2025 18:26

لاہور(اُردو پوائنٹ اخبارتازہ ترین - این این آئی۔ 11 جون2025ء)سعودی عرب میں عمرہ سیزن 1447 ہجری کا آغاز ہو گیا، عمرہ پرمٹ نسک ایپلی کیشن کے ذریعے جاری کیے جائیں گے۔سعودی عرب کی وزارت حج و عمرہ کے اعلان کے مطابق 1447 ہجری کے نئے عمرہ سیزن کا آغاز 10 جون سے ہو چکا ہے جس کے تحت مملکت سے باہر سے آنے والے زائرین کے لیے ویزے جاری کیے جا رہے ہیں۔رپورٹ کے مطابق وزارت نے تصدیق کی ہے کہ غیر ملکی معتمرین کے لیے عمرہ پرمٹ بدھ کے روز سے نسک ایپلی کیشن کے ذریعے جاری کرنا شروع کر دئیے گئے ہیںجو حکومتی خدمات کے لیے ایک متحدہ ڈیجیٹل پلیٹ فارم ہے۔

وزارت کے مطابق نسک پلیٹ فارم صارفین کو سہولت کے ساتھ عمرہ پرمٹ بک کرنے اور حاصل کرنے کی سہولت فراہم کرتا ہے جبکہ اس کے ذریعے کئی دیگر ڈیجیٹل خدمات بھی فراہم کی جاتی ہیں جن کا مقصد عمرہ کی مجموعی تجرباتی کیفیت کو بہتر بنانا ہے۔

(جاری ہے)

نئے عمرہ سیزن کے لیے تکنیکی اور آپریشنل تیاریاں پہلے ہی مرحلے میں مکمل کر لی گئی تھیں جنہیں متعلقہ اداروں سے تعاون کے ساتھ ترتیب دیا گیا، تاکہ زائرین کو بہتر سہولیات میسر آئیں اور تمام عمل کو موثر انداز میں چلایا جا سکے۔

وزارت نے یہ بھی واضح کیا کہ عمرہ خدمات کے دائرہ کار کو وسعت دینے کے لیے متعدد زبانوں میں ڈیجیٹل اور تعلیمی خدمات کی فراہمی پر کام جاری ہے، اور اس امر کو یقینی بنایا جا رہا ہے کہ زائرین کے لیے سہولت، حفاظت اور آرام کے اعلی ترین معیار برقرار رکھے جائیں۔