صوبائی وزیر خواجہ سلمان رفیق کا ایمرجنسی سروسز ہیڈکوارٹرز کا دورہ

بدھ 11 جون 2025 19:27

لاہور (اُردو پوائنٹ اخبارتازہ ترین - این این آئی۔ 11 جون2025ء) صوبائی وزیر محکمہ صحت و ایمرجنسی سروسز پنجاب خواجہ سلمان رفیق نے ایمرجنسی سروسز ہیڈکوارٹرز کا دورہ کیا۔سیکرٹری ایمرجنسی سروسز ڈاکٹر رضوان نصیر نے جائزہ اجلاس میں عید الاضحی پر خصوصی ڈیوٹی اور ریسکیو کی کارکردگی و ترقیاتی اہداف پر صوبائی وزیرصحت کو بریفنگ دی۔صوبائی وزیر محکمہ صحت و ایمرجنسی سروسز پنجاب خواجہ سلمان رفیق نے کہاکہ وزیر اعلیٰ پنجاب مریم نواز شریف کی قیادت میں ایئر ایمبولینس سروس اب تک 166 شدید علیل لوگوں کو دور دراز علاقوں سے بہتر علاج کیلئے منتقل کر چکی ہے۔

موٹر وے ایمبولینس سروس اور ائیر ایمبولینس سروس حکومت پنجاب کے رواں سال کے بہترین اور تاریخی فلاحی پراجیکٹ ہیں۔اضلاع اور تحصیل کے بعد 31 نئے ٹاؤنز میں ریسکیو سروسز شروع کی جائے گی۔

(جاری ہے)

39 نئی تحصیلوں میں ایمبولینس سروس کے بعد فائر سروس شروع کی جارہی ہے۔ خواجہ سلمان رفیق نے کہاکہ عید تعطیلات کے دوران عوم کو 24 گھنٹے ریسکیو سروسز کی فراہمی قابل ستائش ہے۔

اگلے سال بھکر میں ائیر سٹرپ کی تعمیر کے بعد ائیر ایمبولینس آپریشن بھکر سے بھی ہوسکے گا۔ اگلے سال ریسکیو انٹرن پروگرام پنجاب بھر میں گیم چینجر ہوگا۔ وزیرصحت پنجاب نے کہاکہ وزیر اعلیٰ پنجاب مریم نواز شریف کے ویژن کے مطابق ایمرجنسی سروسز کے معیار کو مزید بہتر بنایا جا رہا ہے۔پنجاب ایمرجنسی سروس کی آپریشنل صلاحیتوں کو مزید بہتر کریں گے۔ حکومت پنجاب بہت جلد ریسکیو 1122 کے تمام اسٹیشنز کو سولرآئزڈ کر دے گی۔ خواجہ سلمان رفیق نے کہاکہ سب سے زیادہ ایمرجنسیز 3090 لاہور، 1889 فیصل اباد، 1490 ملتان اور 1396 بہاولپور اور 22960 باقی اضلاع میں رپورٹ ہوئیں۔