گور نر خیبر پختونخوا سے او جی ڈی سی ایل کے ایم ڈی کی ملاقات ،گیس کی فراہمی کی صورتحال پرگفتگو

جنوبی اضلاع کے لیے جاری گیس فراہمی کے منصوبوں کو ترجیحی بنیادوں پر مکمل کیا جائے، فیصل کریم کنڈی کی ہدایت

جمعہ 1 اگست 2025 23:07

گور نر خیبر پختونخوا سے او جی ڈی سی ایل کے ایم ڈی کی ملاقات ،گیس کی فراہمی ..

اسلام آباد (اُردو پوائنٹ اخبارتازہ ترین - این این آئی۔ 01 اگست2025ء) گورنر خیبرپختونخوا فیصل کریم کنڈی سے آئل اینڈ گیس ڈیولپمنٹ کمپنی لمیٹڈ کے مینیجنگ ڈائریکٹر احمد حیات لک نے اسلام آباد میں ملاقات کی۔

(جاری ہے)

خیبر پختونخوا اسمبلی میں پیپلز پارٹی کے پارلیمانی لیڈر رکن صوبائی اسمبلی احمد کریم کنڈی بھی انکے ہمراہ تھے ملاقات میں جنوبی اضلاع میں گیس فراہمی کی صورتحال اور مستقبل کے توسیعی منصوبہ جات پر تفصیلی تبادلہ خیال کیا گیا، گورنر نے گیس کے نظام کو بہتر بنانے اور عوامی ضروریات کو مدنظر رکھتے ہوئے جلد از جلد اقدامات اٹھانے پر زور دیا انہوں نے او جی ڈی سی ایل حکام کو ہدایت کی کہ جنوبی اضلاع کے لیے جاری گیس فراہمی کے منصوبوں کو ترجیحی بنیادوں پر مکمل کیا جائے۔

انہوں نے کہا کہ سردیوں کی آمد سے قبل تمام تکنیکی اور انتظامی رکاوٹوں کو دور کیا جائے تاکہ عوام کو کسی قسم کی پریشانی کا سامنا نہ ہو۔ملاقات میں درابن اور دیگر علاقوں میں مجوزہ توسیعی منصوبوں، نئی گیس پائپ لائنز بچھانے، موجودہ انفراسٹرکچر کی اپ گریڈیشن اور نئے ذخائر کی تلاش جیسے امور پر بھی بات چیت کی گئی۔ گورنر نے اس بات پر زور دیا کہ ان ترقیاتی اقدامات سے نہ صرف عوام کو ریلیف ملے گا بلکہ علاقائی معیشت کو بھی فروغ ملے گا۔