نریندر مودی کو جی سیون کانفرنس میں مدعو کرنے پر کینیڈا کی سکھ کمیونٹی سراپا احتجاج

بدھ 11 جون 2025 21:54

اوٹاوا (اُردو پوائنٹ اخبارتازہ ترین - اے پی پی۔ 11 جون2025ء) بھارتی وزیر اعظم نریندر مودی کو جی سیون کانفرنس میں مدعو کرنے پر کینیڈا کی سکھ کمیونٹی سراپا احتجاج ہے اور اس کے خلاف احتجاجی مظاہروں کا پروگرام بنارہی ہے۔ کشمیرمیڈیاسروس کے مطابق کینیڈا میں مقیم سکھ کمیونٹی کی متعدد تنظیمیں جی سیون ممالک کی کانفرنس میں بھارتی وزیرِ اعظم نریندر مودی کو دعوت دینے کے خلاف دارالحکومت اٹاوہ میں 14جون کو پارلیمنٹ عمارت کے سامنے احتجاجی مظاہرہ کریں گی۔

جی سیون ممالک کی کانفرنس میں بھارتی وزیرِ اعظم نریندر مودی کو دعوت دینے کے خلاف احتجاجی مظاہرہ کرنے والی تنظیموں میں سکھ فیڈریشن کینیڈا، اونٹاریو گردوارہ کمیٹی، کیوبک سکھ کونسل اور ورلڈ سکھ آرگنائزیشن آف کینیڈا شامل ہیں۔

(جاری ہے)

سکھ کمیونٹی کینیڈا کے وزیرِ اعظم مارک کارنی کی جانب سے نریندر مودی کو مدعو کرنے پر سراپا احتجاج ہے۔ سکھ تنظیموں نے ارکانِ پارلیمنٹ کو بھی کھلا خط لکھا ہے کہ بھارتی حکام کی جانب سے کینیڈین شہری ہر دیپ سنگھ نِجر کے قتل میں ملوث ہونے کی تصدیق ہو چکی ہے، اس لیے مودی کو دعوت دینے کی کھلے عام مخالفت کی جائے اور دونوں ممالک کا سکیورٹی تعاون معطل کیا جائے۔

یاد رہے کہ جسٹن ٹروڈو کی وزارتِ عظمی کے دوران کینیڈا اور بھارت کے تعلقات کشیدہ رہے ہیں اور جسٹن ٹروڈو نے ہردیپ سنگھ نِجر کے قتل کی ذمہ داری بھارت پر عائد کی تھی۔