Live Updates

گلشن اقبال ٹائون کا عوامی شمولیت سے بجٹ تیار کرنے کا فیصلہ

بجٹ 2025-26 کی تیاری میں شہریوں کی رائے کو بنیادی حیثیت حاصل ہوگی ، چیئرمین ڈاکٹر فواد احمد

بدھ 11 جون 2025 20:25

کراچی (اُردو پوائنٹ اخبارتازہ ترین - این این آئی۔ 11 جون2025ء) چیئرمین گلشن اقبال ٹائون، ڈاکٹر فواد احمد نے ٹائون کے بجٹ 2025-26 کی تیاری میں عوامی شمولیت کو یقینی بنانے کے لیے ایک مثالی قدم اٹھاتے ہوئے علاقے کے مکینوں سے براہِ راست رائے طلب کرلی ہے انہوں نے گلشن اقبال ٹان کے مکینوں سے گزارش کی ہے کہ بجٹ کی تیاری میں ٹان انتظامیہ کو پیشہ ور ماہر حضرات اپنی معاونت فراہم کریں تاکہ آئندہ گلشن اقبال ٹان کا بجٹ تاریخی اور عوامی فلاح پر مشتمل ہو،اس اقدام کے تحت گلشن اقبال ٹان کراچی کا پہلا ٹان ہے جہاں بجٹ تیار کرنے کیلئے عوامی آرا کو اہمیت دیجارہی ہے ۔

ڈاکٹر فواد احمد کا کہنا ہے کہ عوامی فلاح و بہبود اور بنیادی بلدیاتی سہولیات کی بہتری کے لیے بجٹ کی تیاری ایک اہم مرحلہ ہے۔

(جاری ہے)

ہم روایتی انداز سے ہٹ کر بین الاقوامی معیار پر مبنی بجٹ تیار کرنے کی کوشش کر رہے ہیں ، جس میں پیشہ ورانہ صلاحیتوں کے حامل شہریوں کی براہِ راست شمولیت اہم کردار ادا کرے گی انہوں نے کہا کہ ٹان کے افسران اور عملہ دن رات محنت کر رہے ہیں تاکہ ٹیم ورک کے ذریعے عوام کو بہترین خدمات فراہم کی جاسکیں۔

ان کا کہنا تھا کہ گزشتہ برسوں کے مقابلے میں گلشن اقبال ٹان نے بنیادی سہولیات کی فراہمی میں نمایاں بہتری دکھائی ہے۔چیئرمین نے علاقے کے رہائشیوں سے اپیل کی ہے کہ وہ اپنے تجاویز اور آرا ہمارے اس واٹس ایپ نمبر: 0331-8708507 یا دی گئی ہماری اس ای میل: [email protected] کے ساتھ گلشن اقبال ٹان کے مرکزی دفتر میں بھی جمع کروائیں تاکہ انہیں بجٹ میں شامل کیا جا سکے اورمزید ترجیحات طے کی جاسکیں گی ۔یہ اقدام نہ صرف شفافیت اور عوامی اعتماد میں اضافہ کرے گا بلکہ بجٹ کی تیاری کو ایک جمہوری عمل بنانے کی طرف بھی اہم قدم ثابت ہوگا۔