Live Updates

شدید گرمی کی لہر برقرار، محکمہ موسمیات نے کئی علاقوں میں بارش کی پیشگوئی کردی

بالائی خیبر پختونخواہ، جنوبی پنجاب، خطہ پوٹھوہار، کشمیر اور گلگت بلتستان میں موسم جزوی طور پر ابر آلود رہنے کا امکان

ساجد علی جمعرات 12 جون 2025 13:23

شدید گرمی کی لہر برقرار، محکمہ موسمیات نے کئی علاقوں میں بارش کی پیشگوئی ..

اسلام آباد ( اُردو پوائنٹ اخبارتازہ ترین۔ 12 جون 2025ء ) ملک بھر میں شدید گرمی کی لہر برقرار ہے تاہم محکمہ موسمیات کی جانب سے کئی علاقوں میں بارش کی پیشگوئی کردی گئی۔ میڈیا رپورٹس کے مطابق محکمہ موسمیات کا کہنا ہے کہ اسلام آباد اور اس کے گرد و نواح میں دن کے وقت موسم شدید گرم رہے گا تاہم رات کے اوقات میں بعض مقامات پر آندھی اور بارش کی توقع ہے، بالائی خیبر پختونخواہ، جنوبی پنجاب، خطہ پوٹھوہار، کشمیر اور گلگت بلتستان میں موسم جزوی طور پر ابر آلود رہنے کے ساتھ گرد آلود ہوائیں چلنے اور گرج چمک کے ساتھ بارش کا امکان ہے، مری، گلیات، اٹک اور چکوال میں بھی بارش کا امکان ہے، پنجاب کے میدانی علاقوں میں گرد آلود اور تیز ہوائیں چلنے کی پیشگوئی کی گئی ہے، تاہم تلہ گنگ، جہلم اور راولپنڈی کے چند مقامات پر ہلکی بارش ہوسکتی ہے۔

(جاری ہے)

بتایا گیا ہے کہ خیبرپختونخواہ کے میدانی علاقوں میں بھی تیز اور گرد آلود ہوائیں چل سکتی ہیں، رات کے وقت چترال، دیر، سوات، مالاکنڈ، مانسہرہ، شانگلہ، کوہستان اور ایبٹ آباد میں گرج چمک کے ساتھ بارش متوقع ہے جب کہ صوبہ سندھ کے بیشتر اضلاع میں موسم شدید گرم اور خشک رہے گا، اسی طرح بلوچستان کے بھی اکثر علاقوں میں گرمی کی شدت برقرار رہنے کا امکان ہے، محکمہ موسمیات نے شہریوں کو موسم کی ممکنہ شدت کے پیش نظر احتیاطی تدابیر اختیار کرنے کی ہدایت کردی۔

بتایا جارہا ہے کہ گزشتہ 24 گھنٹے کے دوران ملک کے بیشتر علاقوں میں موسم گرم اور خشک رہا، میدانی علاقے شدید گرمی کی لپیٹ میں رہے، اس دوران سب سے زیادہ درجہ حرارت بھکر اور جیکب آباد میں 49 ڈگری سینٹی گریڈریکارڈ کیا گیا، شہریوں کو ہدایت کی جاتی ہے کہ وہ شدید گرمی کے پیش نظر احتیاطی تدابیر اختیار کریں اور بلا ضرورت گھروں سے باہر نکلنے سے گریز کریں۔