دارالحکومت کے مختلف علاقوں میں شادی بیاہ و دیگر تقریبات پر ہوائی فائرنگ،آتشیں اسلحہ کا استعمال معمول بن گیا

مظفرآباد(اُردو پوائنٹ اخبارتازہ ترین - این این آئی۔ 12 جون2025ء) دارالحکومت کے مختلف علاقوں میں شادی بیاہ و دیگر تقریبات پر ہوائی فائرنگ،آتشیں اسلحہ کا استعمال معمول بن گیا۔متعلقہ تھانے، ضلعی انتظامیہ خاموش تماشائی کا کا کردار ادا کرنے لگی۔پسند و ناپسند کی بنیاد پر کاروائیاں وجہ حیرت بن گئیں،تگانہ صدر سب پر بازی لے گیا،چہلہ بانڈی،گوجرہ گولیوں کی تڑتڑاہٹ اور دھماکوں سے میدان جنگ کا منظر پیش کرنے لگے،نیشنل ایکشن پلان مزاق بن کر رہ گیا،قابل زکر اور مدبر عوام کی جانب سے سخت ایکشن لینے کا مطالبہ۔

تفصیلات کے مطابق شہر اقتدار مظفرآباد میں شادی/ مہندی اور ان سے منسلک رسومات کا سلسلہ عروج پر ہے۔انتظامیہ ستو پی کر سو گئی ہے۔آئے روز شہر بھر کے تمام علاقوں خاص کر چہلہ بانڈی،گسجرہ،اپر چھتر میں ہوائی فائرنگ معمول بن چکی ہے۔

(جاری ہے)

آتشیں اسلحہ کا استعمال بڑھ چکا ہے اور بڑے گولے جن کی آواز سے لوگ بھی بھارتی گولہ باری کے تناظر میں خوف زدہ ہو جاتے ہیں ان کا استعمال معمول بن چکا ہے۔

مظفرآباد میں اندھیر نگری چوپٹ راج ہے۔چئیرمین امن اتحاد ایکشن کمیٹی و سوشل یونائیٹڈ فورم نلوچھی طارق خان مغل،چئیرمین بنت حوا ایکشن کمیٹی محترمہ نازیہ ملک نے کہا ہے کہ جموں وکشمیر جوائنٹ عوامی ایکشن کمیٹی جب کوئی احتجاج کی کال دیتی تو اس وقت انتظامیہ فورا دفعہ 144 کا نفاذ کر دیتی ہے لیکن اب ہم انتظامیہ سے پولیس سے یہ پوچھنا چاہیں گے کہ آئے روز سورج ڈھلتے ہی مظفرآباد میں ہوائی فائرنگ معمول بنا ہوا ہے۔

جب آپ کسی کو اپنا نشانہ بنانا چاہیں تو پتہ لگوا لیتے ہیں کہ مرغی نے کتنے انڈے بچے دئیے ہیں۔آپ کے سہولت کار، ٹاؤٹ، سورس آپ کو شکایت کر دیتے ہیں کہ فلاں جگہ کام ہو رہا ہے، مشین لگی ہے۔ لیکن آپ کی ناک کے نیچے چہلہ بانڈی سمیت یونین کونسل گوجرہ اور دیگر علاقوں میں ہوائی فائرنگ اور سخت بڑے گولوں کے پھٹنے نے انت مچا رکھی ہے لیکن ابھی تک آپ کا قانون حرکت میں نہیں آیا ہے۔

ہم پوچھنا چاہتے ہیں کہ اگر کوئی مزدور غریب کبھی کوئی ہوائی فائر کر دے تو اس کو پکڑ کر آپ مقدمہ درج کر دیتے ہو۔لوگوں پر گیڈر، سور اور چوہیے اور مچھر مارنے پر بھی آپ مقدمات درج کرتے ہیں اور آپ کا قانون حرکت میں آ جاتا ہے۔ دفعہ ایک سو چوالیس لگ جاتا ہے لیکن یہاں آپ کوئی نوٹس نہیں لے رہے ہیں۔ شہر اور یوسی گوجرہ کے ایریا سے لوگ جوائنٹ عوامی ایکشن کمیٹی کو کال کر کے شکایات درج کرا رہے ہیں، توجہ مبذول کروا رہے ہیں کہ ہماری رات کی نیندیں حرام ہو چکی ہیں۔

شہر میں رات کو آپ مزدروں کی ریڑھی اٹھا لیتے ہیں۔جرمانہ کر دیتے ہیں،قانون سب کے لیے رکھیں۔فوری طور پر مظفرآباد میں اس مزاج اس رواج کے خلاف اور اس بڑھتے ہوئے شوق کے خلاف ایکشن لیا جائے۔ ورنہ اس رجحان کو ختم کرنا مشکل ہو جائے گا آنے والے وقت میں یہیں سے آتشیں اسلحہ کا استعمال بڑھے گا اور شہر میں جرائم زیادہ ہوں گے۔انہوں نے مذید کہا کہ اپنے لاڈلوں کو نکیل ڈالی جائے۔