حادثے کا شکارایئرانڈیا کی پروازمیں 169 انڈین شہری، 53 برطانوی شہری، پرتگال کے سات شہری اور کینیڈا کا ایک شہری سوار تھے .بھارتی حکام

طیارہ ایئرپورٹ کے حدود کے باہر ڈاکٹروں کے ایک ہاسٹل پر گرا‘ پولیس، فائر فائٹرز اور دیگر امدادی اہلکار موقع پر چند ہی منٹ میں پہنچ گئے اور تاحال ریسکیو آپریشنز جاری ہیں.احمد آباد پولیس کے سنیئرافسرکی گفتگو

میاں محمد ندیم جمعرات 12 جون 2025 16:35

حادثے کا شکارایئرانڈیا کی پروازمیں 169 انڈین شہری، 53 برطانوی شہری، پرتگال ..

نئی دہلی(اردوپوائنٹ اخبارتازہ ترین-انٹرنیشنل پریس ایجنسی۔12 جون ۔2025 )بھارتی فضائی کمپنی ایئرانڈیا کا حادثے کا شکار ہونے والے مسافر طیارے کے مسافروںمیں 169 انڈین شہری، 53 برطانوی شہری، پرتگال کے سات شہری اور کینیڈا کا ایک شہری شامل ہیں انڈین وزارت برائے ایوی ایشن کے مطابق طیارے پر مجموعی طور پر 242 افراد سوار تھے جن میں دو پائلٹ اور عملے کے دس اراکین شامل ہیں.

ایئرانڈیا کے مطابق طیارہ حادثے میں زخمی ہونے والے افراد کو نزدیکی ہسپتالوں میں لے جایا گیا ہے ایئر انڈیا کا مسافر طیارہ احمد آباد ایئرپورٹ کے قریب گر کر تباہ ہوا فلائٹ ریڈار کے مطابق اس سے آخری سگنل چند سیکنڈ پہلے صرف 625 فٹ کی بلندی پر موصول ہوا .

(جاری ہے)

احمد آباد میں ایک سینیئر پولیس افسر نے بھارتی نشریاتی ادارے کو بتایا ہے کہ حادثے کا شکار ہونے والا طیارہ ایئرپورٹ کے حدود کے باہر واقع ڈاکٹروں کے ایک ہاسٹل پر گرا ہے انہوں نے بتایا کہ پولیس، فائر فائٹرز اور دیگر امدادی اہلکار موقع پر چند ہی منٹ میں پہنچ گئے اور تاحال ریسکیو آپریشنز جاری ہیں.

انڈین ایوی ایشن اتھارٹی کی جانب سے اس حادثے کے بعد پہلا بیان سامنے آیا ہے جس میں بتایا گیا ہے کہ حادثے کا شکار ہونے والی فلائٹ احمد آباد کے ایئرپورٹ سے ٹیک آف کرنے کے فوراً بعد کریش ہو گئی بیان میں بتایا گیا ہے کہ طیارے پر 242 افراد سوار تھے جن میں دو پائلٹ اور 10 کیبن کریو شامل تھے ایوی ایشن ڈائریکٹوریٹ کے ایک اہلکار نے اس سے قبل یہ تعداد 244 بتائی تھی طیارے کے کپتان کا 8200 گھنٹوں کا فلائنگ کا تجربہ تھا جبکہ ان کے ساتھی پائلٹ کا تجربہ 1100 گھنٹوں کا تھا.

ایئرانڈیا کے طیارے نے احمد آباد ایئرپورٹ کے رن وے نمبر 23 سے دن ایک بج کر 39 منٹ پر لندن کے لیے اڑان بھری تھی اور ٹیک آ ف کے کچھ ہی دیر بعد ایئر ٹریفک کنٹرول کو طیارے سے” مے ڈے“ کال موصول ہوئی لیکن اس کے بعد طیارے کا کنٹرول ٹاور سے رابط ختم ہوگیا. حکام کے مطابق امدادی ٹیمیں جائے حادثہ پر آپریشن جاری رکھے ہوئے تاہم ابھی تک ہلاکتوں یا زخمیوں کے بارے میں کوئی اطلاع نہیں ہے بھارتی ذرائع ابلاغ کے مطابق احمد آباد ایئرپورٹ سے دور شہر ی علاقوں سے گہرے دھویں کے بادل دیکھے جاسکتے ہیں ‘رپورٹ میں بتایا گیا ہے کہ شہر بھر کے ہسپتالوں میں ہنگامی حالت نافذکردی گئی ہے اور سینکڑوں ایمبولینسوں کے علاوہ کئی ہیلی کاپٹر بھی زخمیوں کو منتقل کرنے کے لیے مختص کردیئے گئے ہیں.