سیلاب سے متاثرہ گھریلو صارفین کے 1 ماہ کے بجلی کے بل معاف کرنے کا اعلان

اسلام آباد ( اُردو پوائنٹ اخبارتازہ ترین۔ 14 ستمبر 2025ء ) وزیراعظم نے سیلاب سے متاثرہ گھریلو صارفین کے ایک ماہ کے بجلی کے بل معاف کرنے کا اعلان کردیا۔ تفصیلات کے مطابق قوم سے خطاب کرتے ہوئے انہوں نے سیلاب متاثرین کے لیے امدادی پیکج کا اعلان کرتے ہوئے کہا کہ حالیہ بارش اور سیلاب سے ملک کے مختلف علاقوں میں بہت زیادہ تباہی ہوئی، سیلاب سے جانی نقصان کے ساتھ ساتھ لوگوں کے مال مویشی، گھر اور روزگار کو نقصان پہنچا، متاثرہ آبادیوں میں اشیائے خوردونوش اور صحت کی سہولیات کے لیے وفاقی، صوبائی حکومتیں اور عوام اور فوج سب مل کر ریسکیو اینڈ ریلیف آپریشن جاری رکھے ہوئے ہے، سیلاب سے متاثرہ علاقوں کی مکمل آباد کاری کے اپنے عزم کا اعادہ کرتا ہوں اور ہم سب اس وقت تک چین سے نہیں بیٹھیں گے جب تک سیلاب سے متاثرہ ہر شخص کو اس کے گھر میں دوبارہ آباد نہ کرلیں۔

(جاری ہے)

وزیراعظم نے کہا کہ سیلاب متاثرہ علاقوں میں بجلی کے بل معاف کیے جارہے ہیں، تمام گھریلو صارفین کو ایک ماہ یعنی اگست کے بل ادا نہیں کرنا ہوں گے، وفاقی حکومت بجلی کے بل اپنے وسائل سے ادا کرے گی، میرے بزرگوں، بھائیوں اور بہنوں ہمیں آپ کی مشکلات کا اندازہ ہے، اس مشکل گھڑی میں بجلی کے بلوں کی ادائیگی وفاقی حکومت اپنے وسائل سے کرے گی اور یہ سیلاب متاثرین کا حق ہے کوئی احسان نہیں، ان متاثرہ علاقوں کے وہ گھریلو صارفین جو اگست کا بل ادا کرچکے ہیں، انہیں اگلے ماہ بجلی کے بل میں یہ رقم واپس ادا کردی جائے گی اور اس حوالے سے واضح ہدایات جاری کردی گئی ہیں۔

شہباز شریف کہتے ہیں کہ سیلاب سے متاثرہ علاقوں میں زرعی اور صنعتی شعبوں سے وابستہ بجلی کے صارفین کے نقصانات کا تفصیلی تخمینہ لگایا جارہا ہے لہذا ان کے اگست کے بجلی کے بل کے ادائیگی مؤخر کی جارہی ہے، اگر ان صارفین کے نقصانات کا تخمینہ زیادہ نکلا تو انہیں مزید ریلیف دینے کے حوالے سے اقدامات کیے جائیں گے، اس حوالے سے متعلقہ بجلی تقسیم کار کمپنیوں کو ضروری ہدایات فوری طور پر جاری کردی گئی ہیں، سیلاب سے متاثرہ علاقوں میں جو تباہی ہوئی اور جو نقصانات ہوئے، وہاں میرے بزرگ، مائیں بہنیں اور بیٹیاں کھلے آسمان تلے جن مشکلات کا شکار ہیں، ہم ان سے بخوبی واقف ہیں، اس صورتحال کے پیش نظر آپ کے خادم پاکستان کی جانب سے یہ حقیر سی کوشش ہے جو یقینی طور پر سیلاب متاثرین کے مشکلات میں کمی کا باعث بنے گی۔