جرمن سفارتخانے کے وفد کا جامعہ قراقرم کا دورہ، اعلیٰ تعلیم وتحقیق سمیت مختلف شعبہ جات میں کام کرنے پر تبادلہ خیال

جمعرات 12 جون 2025 19:40

گلگت (اُردو پوائنٹ اخبارتازہ ترین - اے پی پی۔ 12 جون2025ء) جرمن سفارتخانے کے وفد نے قراقرم انٹرنیشنل یونیورسٹی کا دورہ کیا۔شعبہ تعلقات عامہ کے آئی یو کے مطابق وفد نے یونیورسٹی کے سینئرانتظامی وتدریسی آفیسران سے ملاقات کی۔ ملاقات میں یونیورسٹی ڈائریکٹر اکیڈمک ڈاکٹر سجاد علی نے یونیورسٹی میں جاری تعلیمی وتحقیقی امور سے متعلق وفد کو آگاہ کیا۔

اس کے علاوہ ملاقات میں تحقیقاتی منصوبوں، طلبہ کے تبادلہ پروگراموں اور فیکلٹی کی ترقی جیسے ممکنہ تعاون کے مواقع پر تبادلہ خیال کیا۔

(جاری ہے)

کے آئی یو کے وائس چانسلر پروفیسر ڈاکٹر عطاء اللہ شاہ نے اسلام آباد سے آن لائن شرکت کی اور عالمی شراکت داریوں کو مضبوط کرنے کے لیے یونیورسٹی کے عزم پر زور دیا۔اس دورے سے دونوں ممالک کے درمیان تعلیمی اور ثقافتی تبادلوں کو مضبوط کرنے میں مد د ملے گی۔

دونوں فریقین نے مستقبل میں مل کر کام کرنے سمیت باہمی فوائد کے حامل جدید منصوبے شروع کرنے پر اتفاق کیا۔اجلاس میں فیکلٹی ممبران نے خطے میں عالمی روابط کو فروغ دینے اور تعلیمی مواقع کو آگے بڑھانے کے لیے جامعہ قراقرم کے کلیدی کردار پر سیر حاصل گفتگو کی۔جسے جرمن وفد نے سراہتے ہوئے جامعہ قراقرم کے ساتھ مل کرکام کرنے کے عزم کا اظہار کیا۔