پ*دھاتی ڈور و پتنگ بازی کا خاتمہ، پنجاب پولیس صوبہ بھر میں ان ایکشن

ٌ پنجاب پولیس کا لاہور سمیت صوبہ بھر میں اینٹی کائٹ فلائنگ ایکٹ کی خلاف ورزی پر زیرو ٹالرنس ×رواں سال لاہور سمیت صوبہ بھر میں انسداد پتنگ بازی ایکٹ کی خلاف ورزی پر3815 ملزمان گرفتار، 3730 مقدمات درج کئے گئے، ترجمان

جمعرات 12 جون 2025 20:20

ٖ لاہور (اُردو پوائنٹ اخبارتازہ ترین - آن لائن۔ 12 جون2025ء) انسپکٹر جنرل پولیس پنجاب ڈاکٹر عثمان انور کی ہدایت پر صوبہ بھر میں پنجاب پولیس کا دھاتی ڈور و پتنگ بازی کے خاتمے کے لیے زیرو ٹالرینس پالیسی کے تحت کریک جاری ہے جس کے تسلسل میں رواں سال لاہور سمیت صوبہ بھر میں انسداد پتنگ بازی ایکٹ کی خلاف ورزی پر 3815 ملزمان کو گرفتار کر کے 3730 مقدمات درج کئے گئے۔

ترجمان پنجاب پولیس نے تفصیلات سے آگاہ کرتے ہوئے بتایا کہ 04 لاکھ 56 ہزار 374 پتنگیں، 16 ہزار 808 ڈور کی چرخیاں برآمد اور 3414 کیسز کے چالان جمع کروائے گئے۔ صوبائی دارالحکومت لاہور میں 1080 ملزمان گرفتار، 1052 مقدمات درج، 26339 پتنگیں اور 1295 ڈور کی چرخیاں برآمد کی گئیں۔ گذشتہ سال لاہور سمیت صوبہ بھر میں 12525 ملزمان کو گرفتار کر کے 11866 مقدمات درج کیے گئے تھے۔

(جاری ہے)

آئی جی پنجاب نے افسران کو ہدایت دیتے ہوئے کہا کہ پتنگ بازی ممانعت ترمیمی بل کے قانون پر سختی سے عملدرآمد یقینی بنائیں۔آر پی اوز، سی پی اوز، ڈی پی اوز پتنگ بازوں، پتنگ فروشوں اور مینوفیکچررز کے خلاف کریک ڈاؤن میں تیزی لائیں۔ جان لیوا سرگرمی کی ہرگز اجازت نہیں ہے اور خونی دھندے میں ملوث افراد کے خلاف زیرو ٹالرنس پالیسی اپنائیں۔ دھاتی ڈور اور پتنگوں کے آن لائن کاروبار میں ملوث عناصر کو بھی قانون کی گرفت میں لایا جائے۔ ڈاکٹر عثمان انور نے کہا کہ والدین اپنے بچوں کو اس خونی کھیل سے دور رکھیں اور شہری کسی بھی مقام پر پتنگ بازی کی صورت میں 15 پر اطلاع دے کر ذمہ داری کا ثبوت دیں۔