اسرائیل کے ایران کی جوہری اور عسکری تنصیبات پر حملے

اسلام آباد (اُردو پوائنٹ ۔ DW اردو۔ 13 جون 2025ء) اسرائیلی وزیر دفاع اسرائیل کاٹز کی جانب سے بھی ایران پر حملوں کی تصدیق کر دی گئی ہے۔ یہ پیش رفت امریکی صدر ڈونلڈ ٹرمپ کی جانب سے اس تنبیہ کے بعد سامنے آئی ہے کہ اسرائیل جلد ہی ایران کی جوہری تنصیبات کو نشانہ بنا سکتا ہے۔

اسرائیل نے جمعہ کی علی الصبح ایران کے دارالحکومت پر حملہ کیا، جس کے بعد تہران بھر میں دھماکوں کی آوازیں سنائی دیے جانے کی اطلاعات ہیں۔

مشرق وسطیٰ سے امریکی سفارتی عملے کے انخلا کی وجوہات کیا؟

تازہ حملوں کی اطلاعات

جمعے کی اولین ساعتوں میں ایران پر اسرائیل کے پہلے حملوں کے بعد پھر سے فضائی حملوں کی اطلاعات ہیں اور تہران کے متعدد علاقوں سے دھماکوں کی آوازیں دوبارہ سنی گئی ہیں۔

(جاری ہے)

اسرائیل ڈیفنس فورسز (آئی ڈی ایف) نے حملے سے متعلق ایکس پر ایک ویڈیو بیان جاری کیا، جس میں کہا گیا ہے، "برسوں سے، ایرانی حکومت نے اسرائیل کی ریاست کو تباہ کرنےکے لیے ٹھوس فوجی منصوبہ بندی کی اور اس منصوبے کو آگے بڑھانے کا کام بھی کیا۔"

آئی ڈی ایف کے ترجمان ایفی ڈیفرین نے کہا "گزشتہ چند مہینوں کے دوران، انٹیلیجنس رپورٹ سے پتہ چلا تھا کہ ایران جوہری ہتھیار حاصل کرنے میں پہلے سے کہیں زیادہ قریب ہے۔

ایران پر حملے کا اسرائیلی پلان: سابق سی آئی اے اہلکار کا خفیہ دستاویزات لیک کرنے کا اعتراف

ترجمان نے مزید کہا، "آج صبح، آئی ڈی ایف نے ایرانی جوہری پروگرام کو نشانہ بناتے ہوئے محتاط اور درست حملے شروع کیے تاکہ ایرانی حکومت کی فوری طور پر جوہری بم بنانے کی صلاحیت کو ختم کیا جا سکے۔"

بیان میں مزید کہا گیا، "ہم ایک فوری خطرے کے خلاف کام کر رہے ہیں۔

پاسداران انقلاب کے کمانڈر کی ہلاکت کا خدشہ

جمعے کی صبح آنے والی خبروں کے مطابق ایران کے نیم فوجی دستے پاسداران انقلاب کے کمانڈر حملے میں ہلاک ہو گئے ہیں۔ ایران کے سرکاری ٹیلی وژن نے کہا کہ کمانڈر حسین سلامی کی ہلاکت کا خدشہ ہے۔

پاسداران انقلاب ایران کی سب سے طاقتور فوجی دستوں میں سے ایک ہے۔

ایران کے سرکاری نشریاتی ادارے نے مزید کہا کہ پاسداران انقلاب کے ایک اعلیٰ اہلکار کے ساتھ ساتھ دو جوہری سائنسدانوں کو بھی ہلاک کیا گیا ہے۔

اسرائیل پر حملہ کرنے والے کو بھاری قیمت چکانا پڑے گی، نیتن یاہو

گزشتہ روز ہی حسین سلامی نے خبردار کیا تھا کہ کسی بھی اسرائیلی جارحیت کے لیے ایران کا جواب ماضی کے مقابلے میں "زیادہ طاقتور اور تباہ کن" ہو گا۔

اس دوران تہران کے مرکزی بین الاقوامی ہوائی اڈے سے پروازیں معطل کر دی گئی ہیں۔

ایران کے سرکاری ٹی وی نے ہوائی اڈے کے شعبہ تعلقات عامہ کا حوالہ دیتے ہوئے کہا کہ ایران نے ملک کے مرکزی ہوائی اڈے امام خمینی بین الاقوامی ہوائی اڈے پر پروازیں معطل کر دی ہیں۔

ایران کا رد عمل

ایران کی وزارت خارجہ نے دنیا بھر کے ممالک سے اسرائیل کے حملوں کی مذمت کرنے کا مطالبہ کرتے ہوئے کہا کہ یہ حملہ "عالمی سلامتی کو بے مثال خطرے سے دوچار کرتا ہے۔

اس بیان میں مزید کہا گیا ہے کہ امریکہ، جسے وہ اسرائیل کا اہم حامی کہتا ہے، کو اس حملے کے نتائج کا ذمہ دار ٹھہرایا جائے گا۔ جبکہ امریکہ نے پہلے کہا تھا کہ وہ اس حملے میں ملوث نہیں ہے۔

ایران کے سپریم لیڈر آیت اللہ علی خامنہ ای کا کہنا ہے کہ یہ حملے اسرائیل کی "فطرت" کو ظاہر کرتے ہیں۔ روئٹرز کے مطابق ایران کی مسلح افواج کے ترجمان نے کہا کہ امریکہ اور اسرائیل کو ان حملوں کی "بھاری قیمت" چکانی پڑے گی۔

ایرانی ترجمان ابوالفضل شکرچی نے کہا کہ مسلح افواج یقینی طور پر اس حملے کا جواب دیں گی۔

ایران کی طرف سے اسرائیلی حملے کا ’سخت جواب‘ دینے کے عزم کا اعادہ

ایران کے سرکاری ٹی وی کا کہنا ہے کہ حملوں سے تہران کے رہائشی علاقے متاثر ہوئے اور ہلاک ہونے والوں میں عام شہری بھی شامل ہیں، جن میں بچے بھی ہیں، حالانکہ اس کی آزادانہ طور پر تصدیق نہیں ہو سکی ہے۔

ایران کی جانب سے جوابی حملے کا امکان

اسرائیل کا کہنا ہے کہ ان حملوں کے بعد ایران کی جانب سے بڑی جوابی کارروائی کی توقع ہے، جس کے لیے وہ تیاری کر رہا ہے۔

اسرائیلی وزیر اعظم بینجمن نیتن یاہو نے اسرائیلی شہریوں پر زور دیا کہ وہ فوج کی ہدایات پر عمل کریں۔ انہوں نے یہ بھی کہا کہ شہریوں کو طویل مدت تک پناہ گاہوں میں رہنا پڑ سکتا ہے۔

نیتن یاہو نے ایران پر حملوں کو "بہت کامیاب" قرار دیا، تاہم اسرائیل اب ایران کی جانب سے جوابی حملوں کی توقع میں ہنگامی حالت کی صورت میں ہے۔

امریکہ نے کیا کہا؟

امریکی صدر ڈونلڈ ٹرمپ نے فوکس نیوز کے ساتھ ان حملوں کے بارے میں بات کرتے ہوئے کہا کہ وہ اسرائیل کے منصوبوں سے پہلے ہی آگاہ تھے، تاہم امریکی فوج نے آپریشن میں کوئی کردار ادا نہیں کیا۔

انہوں نے اس بات کا اعادہ کیا کہ انہیں امید ہے کہ ایران اپنے جوہری پروگرام کو روکنے کے لیے امریکہ کے ساتھ مذاکرات جاری رکھے گا۔

انہوں کہا، "ایران کے پاس جوہری بم نہیں ہو سکتا اور ہم مذاکرات کی میز پر واپس آنے کی امید کر رہے ہیں۔ ہم دیکھیں گے۔"

انہوں نے کہا کہ ایرانی "قیادت میں بہت سے لوگ ہیں، جو واپس نہیں آئیں گے۔

ایرانی حکام طے کریں اسرائیل کو کیسے جواب دیا جائے، خامنہ ای

ٹرمپ نے کہا کہ ان کی انتظامیہ نے حملے سے پہلے مشرق وسطیٰ کے اپنے ایک اہم اتحادی سے رابطہ کیا تھا تاکہ انہیں بھی آگاہ کیا جا سکے، تاہم ٹرمپ نے یہ نہیں بتایا کہ یہ کون سا خلیجی ملک ہے۔

اقوام متحدہ نے حملوں کی مذمت کی

اقوام متحدہ کے سربراہ نے مشرق وسطیٰ میں "زیادہ سے زیادہ تحمل" برتنے کا مطالبہ کیا ہے اور ایران کی جوہری تنصیبات پر اسرائیل کے حملوں کی مذمت کی ہے۔

سکریٹری جنرل انٹونیو گوٹیرش کے ایک ترجمان کا کہنا ہے کہ وہ، "خاص طور پر ایران میں جوہری تنصیبات پر اسرائیلی حملوں سے پریشان ہیں جب کہ ایران اور امریکہ کے درمیان ایران کے جوہری پروگرام پر بات چیت جاری ہے۔

ترجمان کا کہنا تھا کہ "سکریٹری جنرل دونوں فریقوں سے زیادہ سے زیادہ تحمل کا مظاہرہ کرنے کی اپیل کر رہے ہیں کہ ہر قیمت پر ایسے گہرے تنازعے کی طرف جانے اور ایسی صورت حال سے گریز کریں، جس کا خطہ شاید ہی متحمل ہو سکے۔"

ادارت: جاوید اختر، عدنان اسحاق