تین کروڑ سے زائد آبادی کے شہر کو مسائلستان بنا دیا،بلال سلیم قادری

حکومت جس دن پانی کی فروخت پر پابندی لگائے گی ہر شہری کے گھر پانی آئے گا، جنرل سیکریٹری پاکستان سنی تحریک

جمعہ 13 جون 2025 20:15

کراچی (اُردو پوائنٹ اخبارتازہ ترین - این این آئی۔ 13 جون2025ء) حکمران کراچی سے وصولیاں تو پوری کرتے ہیں مگر کراچی کو جب دینے کی باری آتی ہے تو ٹال مٹول سے کام لیتے ہیں۔ان خیالات کا اظہار پاکستان سنی تحریک کے مرکزی سیکرٹری جنرل صاحبزادہ علامہ بلال سلیم قادری شامی نے تاجروں کے وفد سے گفتگو کرتے ہوئے کیا۔تاجروں سے ملاقات کے موقع پر تاجروں نے شکوہ کیا کہ ہمیشہ کی طرح اس مرتبہ بھی بجٹ میں ہم پر مزید ٹیکسوں کا بوجھ بڑھایا جا رہا ہے۔

ملک اور قوم کی ترقی کے لیے ہم نے ہمیشہ اپنی خدمات پیش کی ہیں مگر ہمیں کسی طریقے سے ریلیف نہیں دیا جاتا۔بلال سلیم قادری نے گفتگو کرتے ہوئے کہا کہ تین کروڑ سے زائد آبادی کے شہر کو مسائلستان بنا دیاگیا ہے۔حکومت خود تسلیم کرتی ہے کہ کراچی سے وصول ہونے والے محصولات پر ملک کے اخراجات اور ترقیاتی کاموں کا انحصار ہے۔

(جاری ہے)

سب سے زیادہ ٹیکس دینے والا شہر کھنڈرات میں تبدیل ہو گیا ہے۔

ترقیاتی منصوبے تو شروع ہوتے ہیں مگر مکمل ہوتے ہوئے نظر نہیں آتے۔کراچی سے وصول کیے جانے والے ٹیکس سے ملک کے 75 فیصد اخراجات پورے کیے جاتے ہیں۔پانی، بجلی، گیس جیسی بنیادی سہولیات کا ہمیشہ سے فقدان ہے۔سیوریج کے نظام کی یہ حالت ہے کہ سڑکیں اور گلیاں تالاب کا منظر پیش کر رہی ہوتی ہیں مگر متعلقہ محکمہ نے اپنی آنکھوں پر پٹیاں باندھی ہوئی ہیں۔

پینے کے پانی کا انتظام کا یہ حال ہے کہ جگہ جگہ سے لائنیں ٹوٹ پھوٹ کا شکار ہیں۔لاکھوں گیلن پانی روزانہ ضائع ہوتا ہے مگر غریب تک وہ پانی نہیں پہنچ پاتا۔بلال سلیم قادری کا مزید کہنا تھا کہ پانی انسانی زندگی کے لیے بنیادی عنصرکا درجہ رکھتا ہے۔ ویسے تو اس شہرکو شروع سے ہی پانی کی قلت کا سامنا ہے۔جس دن حکومت نے پانی کی فروخت پر پابندی لگا دی شہر میں رہنے والے ہر شخص کے گھر تک پانی پہنچ جائے گا۔

ملک میں غریب ہونا جرم ہے۔غریب کی کہیں بھی کوئی سنوائی نہیں ہے۔بجلی کی لوڈ شیڈنگ اور گیس کی بندش بھی اہم مسئلے ہیں۔ شہر کے کئی علاقے بجلی سے محروم رہتے ہیں اور طویل لوڈ شیڈنگ سے بہت لوگ پریشان ہیں مگر بجلی کے ریٹ بڑھتے ہی چلے جا رہے ہیں۔موجودہ حکمرانوں کو چاہیے کہ ٹیکس بناتے وقت عوام کی مشکلات کو مدنظر رکھیں۔