اسرائیل کا ایران کے مہرآباد ہوائی اڈے پر حملہ، ریڈار سائٹس کو نشانہ بنانے کی اطلاعات

تہران کے مختلف حصوں میں دھماکوں کے بعد فضائی دفاعی سرگرمیاں جاری، مشرقی تہران کے علاقوں حکیمیہ اور تہران‌ پارس میں بھی دھماکوں کی آوازیں سنی گئیں

ساجد علی ہفتہ 14 جون 2025 08:34

اسرائیل کا ایران کے مہرآباد ہوائی اڈے پر حملہ، ریڈار سائٹس کو نشانہ ..

تہران ( اُردو پوائنٹ اخبارتازہ ترین۔ 14 جون 2025ء ) اسرائیل نے ایران کے مہرآباد ہوائی اڈے پر حملہ کردیا اس کے علاوہ ریڈار سائٹس کو بھی نشانہ بنائے جانے کی اطلاعات سامنے آئی ہیں۔ عالمی میڈیا کے مطابق اسرائیل نے ایران کے مہرآباد ہوائی اڈے پر حملہ کرکے اسے شدید نقصان پہنچایا ہے، اسرائیلی فوج کا کہنا ہے کہ ایران کی جانب سے فائر کیے گئے میزائلوں کو روکنے کے لیے دفاعی نظام متحرک ہے، تہران کے وسط میں بھی کئی دھماکے سنے گئے ہیں، تہران کے مہرآباد ہوائی اڈے کو نشانہ بنایا گیا ہے۔

بتایا گیا ہے کہ ایران کے دارالحکومت تہران شہر کے مختلف حصوں میں اب بھی دھماکوں اور فضائی دفاعی سرگرمیوں کی آوازیں سنی جا رہی ہیں، وردآورد کے علاقے میں ایک ریڈار سائٹ کو نشانہ بنایا گیا، جنوبی ایران کے علاقے عبدانان سمیت بعض دیگر مقامات پر بھی ریڈار سائٹس کو نشانہ بنائے جانے کی اطلاعات ہیں۔

(جاری ہے)

ایرانی میڈیا کا کہنا ہے کہ مشرقی تہران کے علاقوں حکیمیہ اور تہران‌ پارس میں بھی دھماکوں کی آوازیں سنی گئیں، حکیمیہ میں امدادی ٹیمیں روانہ کر دی گئی ہیں، سرکاری ذرائع نے مہرآباد کے علاقے میں ایک بڑے دھماکے کی تصدیق کی ہے، علاقے میں آگ اور دھویں کے بادل دیکھائی دیئے گئے، تاہم مہرآباد کے قریب واقع آزادی ٹاور کو نقصان پہنچنے کی خبروں کی تردید کردی گئی۔

دوسری طرف ایران نے حملوں میں تیزی کا اعلان کرتے ہوئے خیبر میزائل حملے کی دھمکی دے دی اور اسرئیل کا دفاع کرنے والے ممالک کے لیے بھی وارننگ جاری کردی، ایران کی پاسداران انقلاب کی جانب سے کہا گیا ہے کہ ایرانی فوج اسرائیل میں ان اہداف کو نشانہ بنا رہی ہے جہاں سے ایران پر جارحیت کی جارہی ہے، ان میزائل حملوں میں 150 اسرائیلی اہداف کو نشانہ بنایا گیا، آپریشن میں اسرائیل کی فوجی تنصیبات کو نشانہ بنایا جارہا ہے جن میں اسرائیلی فوج کے اڈے اور ہتھیار بنانے والی اسرائیلی تنصیبات بھی شامل ہیں، اسرائیل پر خیبر میزائل جلد ہی داغے جائیں گے جس سے دنیا حیران رہ جائے گی۔