Live Updates

تحصیل ہیدکوارٹر ہسپتال سلانوالی میں خون کے عطیات کے عالمی دن کے حوالے سے تقریب کا انعقاد

ہفتہ 14 جون 2025 17:41

سرگودھا (اُردو پوائنٹ اخبارتازہ ترین - اے پی پی۔ 14 جون2025ء) سرگودھا میں خون کے عطیات کا عالمی دن منایا گیا۔ ملک بھر کے دیگر شہروں کی طرح سرگودھا کی تحصیل سلانوالی میں بھی ہفتہ کو خون کے عطیات کا عالمی دن منایا گیا۔ اس سلسلے میں تحصیل ہیڈ کوارٹر ہسپتال سلانوالی میں ایک تقریب کا انعقاد کیا گیا۔ تقریب میں میڈیکل سپرٹینڈنٹ تحصیل ہیڈ کوارٹر ہسپتال سلانوالی ڈاکٹر عبدالرحمن، ڈاکٹر یونس قریشی اور پیراء میڈیکل سٹاف نے شرکت کی۔

اس موقع پر آگاہی واک کا بھی اہتمام کیا گیا۔ آگاہی واک سے خطاب کرتے ہوئے میڈیکل سپریٹینڈنٹ تحصیل ہیڈ کوارٹر ہسپتال ڈاکٹر عبدالرحمن نے کہا کہ انسانی جان بچانا بہت بڑی نیکی ہے اور لوگوں کی جان بچانے کے لیے زیادہ سے زیادہ خون کا عطیہ دینا چاہیے تاکہ زیادہ سے زیادہ انسانی جانیں بچائی جا سکیں۔

(جاری ہے)

اُنہوں نے کہا کہ پاکستان میں خون کے عطیات کی شرح بہت کم ہے اور ایک ہزار میں سے صرف پانچ افراد خون کا عطیہ دیتے ہیں۔

میڈیکل سپریٹینڈنٹ تحصیل ہیڈ کوارٹر ہسپتال ڈاکٹر عبدالرحمن نے کہا کہ ہمیں قومی لیول پر عوامی آگاہی کے لیے واکس اور سیمینارز کا انعقاد کرنا چاہیے تاکہ عوام میں خون دینے کا زیادہ سے زیادہ شعور اُجاگر کیا جا سکے اس کا مقصد خون عطیہ کرنے والوں کی تعداد میں اضافہ کرنا ہے۔ انہوں نے کہا کہ لوگوں کی جان بچانے کے لیے زیادہ سے زیادہ خون کا عطیہ دیں اور ایک شخص کی جان بچانا پوری انسانیت کو بچانے کے مترادف ہے۔ اس موقع پر بڑی تعداد میں لوگوں نے خون کے عطیات دیئے۔