سنجے کپورکی برطانوی شاہی خاندان سے قرابت داری تھی

سنجے کی برطانوی شاہی خاندان سے قرابت داری تھی اور انہیں اکثر شہزادہ ولیم کے ساتھ پولو کھیلنے کے لیے مدعو کیا جاتا تھا

ہفتہ 14 جون 2025 22:05

ْ لندن (اُردو پوائنٹ اخبارتازہ ترین - این این آئی۔ 14 جون2025ء)اداکارہ کرشمہ کپور کے سابق شوہر اور معروف بھارتی صنعت کار سنجے کپور گزشتہ روز دل کا دورہ پڑنے سے انتقال کر گئے تھے۔ان کا شمار دنیا کے امیر ترین افراد میں ہوتا تھا اور ان کی ذاتی دولت کا تخمینہ 1.2 ارب ڈالر ہے۔سنجے نہ صرف معروف کاروباری شخصیت تھے بلکہ دنیا کی اہم شخصیات سے قریبی روابط بھی رکھتے تھے جن میں برطانیہ کا شاہی خاندان بھی شامل ہے۔

سنجے 53 برس کی عمر میں انتقال کر گئے۔سنجے کی برطانوی شاہی خاندان سے قرابت داری تھی اور انہیں اکثر شہزادہ ولیم کے ساتھ پولو کھیلنے کے لیے مدعو کیا جاتا تھا اور وہ برطانیہ کے ایلیٹ پولو سرکٹ کا ایک جانا پہچانا چہرہ تھے۔شاہی خاندان کے ساتھ ان کی وابستگی کافی گہری تھی، جو اکثر انہیں برطانیہ کے سب سے بااثر حلقوں میں شامل کرتی تھی۔

(جاری ہے)

سنجے کپور، آٹو کمپوننٹ کمپنی سونا کومسٹار کے چیئرمین ہونے کے ساتھ ساتھ برطانوی پولو میں طویل عرصے سے موجود تھے اور باقاعدگی سے ہائی پروفائل میچوں میں حصہ لیتے تھے۔

شہزادہ ولیم کے ساتھ میدان میں ان کی موجودگی نہ صرف کھیل کے لیے ان کے جذبے کو ظاہر کرتی ہے بلکہ شاہی خاندان سے ان کے دیرینہ تعلقات کی بھی عکاسی کرتی ہے۔انہوں نے برطانیہ میں تعلیم حاصل کی اور لندن کے اشرافیہ حلقوں میں مضبوط سماجی روابط برقرار رکھے، جہاں انہیں اکثر پولو گرانڈز اور لگژری تقریبات میں دیکھا جاتا تھا۔انہیں پولو کا بے حد شوق تھا اور بدقسمتی سے ان کی زندگی کا اختتام بھی پولو کھیلتے ہی ہوا۔