چینی،تمباکو، ٹرانسپورٹ آلات ، فارما سیوٹیکل ، پلاسٹک اور مچھلی کی برآمدات میں جاری مالی سال کے دوران اضافہ

پیر 16 جون 2025 14:48

اسلام آباد (اُردو پوائنٹ اخبارتازہ ترین - اے پی پی۔ 16 جون2025ء) چینی کی قومی برآمدات میں جاری مالی سال کے دوران 1831.73 فیصد ، تمباکو 143.09 فیصد ، ٹرانسپورٹ آلات کی برآمدات وغیرہ میں 44.22 فیصد ، فارما سیوٹیکل 43.27 فیصد ، پلاسٹک مصنوعات 26.55 فیصد اور مچھلی اور مچھلی کی مصنوعات کی برآمدات میں 8.40 فیصد اضافہ ہواہے ۔ ادارہ برائےشماریات پاکستان (پی بی ایس) کی رپورٹ کےمطابق رواں مالی سال کے ابتدائی 10 ماہ میں جولائی 2024 تا اپریل 2025 کے دوران چینی کی برآمدات کا حجم 40 کروڑ 69 لاکھ 99ہزار ڈالر تک پہنچ گیا جبکہ گذشتہ مالی سال کے اسی عرصہ کے دوران چینی کی برآمدات سے 2 کروڑ 10 لاکھ 69 ہزار ڈالر کا زرمبادلہ کمایاگیا تھا ۔

اسی طرح گذشتہ مالی سال کے مقابلہ میں رواں مالی سال کے دوران چینی کی درآمدات میں 38 کروڑ 59 لاکھ 30 ہزار ڈالر یعنی 1831.73 فیصد کا نمایاں اضافہ ریکارڈ کیا گیا۔

(جاری ہے)

اسی طرح تمباکو کی برآمدات بھی 6 کروڑ 23 لاکھ 68 ہزار ڈالر کے مقابلہ 15 کروڑ 16 لاکھ 8 ہزار ڈالر تک بڑھ گئی ۔ تمباکو کی ملکی برآمدا ت میں گذشتہ سال کےمقابلہ میں جاری مالی سال کے پہلے 10 مہینوں کے دوران 8 کروڑ 92 لاکھ 40 ہزار ڈالر یعنی 143.09 فیصد کا اضافہ ہوا ہے جبکہ ٹرانسپورٹ کی برآمدات بھی 44.22 فیصد کے اضافہ سے گذشتہ سال کی برآمدات ایک کروڑ 85 لاکھ 46 ہزار ڈالر کے مقابلہ میں 2 کروڑ 67 لاکھ 46 ہزار ڈالر تک پہنچ گئی ۔

پی بی ایس کی رپورٹ کےمطابق رواں مالی سال میں ادویہ سازی کی صنعت کی برآمدات میں 43.29 فیصد کی نمایاں بڑھوتری ہوئی ہے اور برآمدات کی مالیت 39کروڑ 16 لاکھ 49 ہزار ڈالر تک بڑھ گئی جبکہ گذشتہ مالی سال کے ابتدائی 10 مہینوں کے دوران 27 کروڑ 33 لاکھ 29 ہزار ڈالر زمبادلہ حاصل ہوا تھا ۔ رپورٹ کے مطابق پلاسٹک مصنوعات کی برآمدات بھی 26.55 فیصد کے اضافہ سے 32 کروڑ 24 لاکھ 12 ہزار ڈالر کے مقابلہ میں 40 کروڑ 80 لاکھ 12 ہزار ڈالر تک پہنچ گئیں ۔

مزید برآں مچھلی اور مچھلی کی مصنوعات کی برآمدات میں بھی رواں مالی سال کے پہلے 10 ماہ کےدوران 8.4 فیصد کا اضافہ ہواہے اور جولائی 2024 تا اپریل 2025 کے دوران زرمبادلہ کا حصول 37 کروڑ 8 لاکھ 91 ہزار ڈالر تک پہنچ گیا جبکہ گذشتہ مالی سال کےاسی عرصہ میں مچھلی اور مچھلی کی مصنوعات کی برآمد سے 34 کروڑ 21 لاکھ 54 ہزار ڈالر زرمبادلہ کمایا گیا تھا ۔\395