پاکستان کی آئی ٹی برآمدات میں غیرمعمولی اضافہ: عالمی منڈی میں قدم مضبوط

ایس آئی ایف سی اور وزارتِ آئی ٹی کی مؤثر پالیسیوں کے ثمرات سامنے آ گئے، ابتدائی نو ماہ میں آئی ٹی برآمدات میں 541 ملین ڈالر کا اضافہ ہوا، رپورٹ

پیر 16 جون 2025 18:01

اسلام آباد (اُردو پوائنٹ اخبارتازہ ترین - آن لائن۔ 16 جون2025ء) پاکستان کی انفارمیشن ٹیکنالوجی (آئی ٹی) اور آئی ٹی سے منسلک سروسز (آئی ٹی ای ایس) کی برآمدات میں رواں مالی سال کے دوران نمایاں اضافہ ریکارڈ کیا گیا ہے، جس نے ملکی معیشت کو نئی توانائی فراہم کی ہے۔ سرکاری اقتصادی جائزے کی رپورٹ کے مطابق رواں مالی سال کے ابتدائی نو ماہ میں آئی ٹی برآمدات میں 541 ملین ڈالر کا اضافہ ہوا، جب کہ مارچ 2025 کے دوران آئی سی ٹی برآمدات میں 12.1 فیصد کا اضافہ دیکھنے میں آیا، جس کی مالیت 342 ملین ڈالر رہی۔

ایس آئی ایف سی کی سرپرستی میں اختیار کی گئی پالیسیوں اور وزارتِ آئی ٹی و ٹیلی کام کی حکمت عملیوں کے باعث پاکستان نے آئی ٹی سیکٹر میں نہ صرف مقامی ترقی کو فروغ دیا بلکہ بین الاقوامی منڈیوں میں بھی اپنی موجودگی کو بہتر بنایا۔

(جاری ہے)

پاکستانی فری لانسرز نے بھی نمایاں کردار ادا کیا، جنہوں نے 400 ملین ڈالر کی ترسیلات کے ذریعے آئی ٹی برآمدات میں کلیدی شراکت فراہم کی۔

اقتصادی رپورٹ کے مطابق آئی ٹی سیکٹر نے 2.42 ارب ڈالر کا تجارتی سرپلس پیدا کیا، جو ملکی معیشت کے لیے ایک خوش آئند پیش رفت ہے۔ جدید ٹیکنالوجیز میں 6,400 افراد کی تربیت اور 2,700 انٹرنز کی مقامی آئی ٹی کمپنیوں میں تقرری سے نوجوانوں کے لیے روزگار کے مواقع بڑھائے گئے، جن میں سے 70 فیصد کو باقاعدہ ملازمت فراہم کی گئی۔اس کے ساتھ ساتھ، 15 معروف آئی ٹی کمپنیوں نے بین الاقوامی معیار کے آئی ایس او سرٹیفیکیٹس حاصل کیے ہیں، جس سے پاکستان کی آئی ٹی انڈسٹری کی عالمی سطح پر ساکھ مزید مستحکم ہوئی ہے۔

مزید برآں، ملک کے بڑے شہروں میں 50 سے زائد سافٹ ویئر ٹیکنالوجی پارکس کے قیام کا منصوبہ بھی زیرِ تکمیل ہے، جو مقامی اور بین الاقوامی سرمایہ کاری کو فروغ دے گا۔ پی ایس ای بی اور ایس آئی ایف سی کی مشترکہ کاوشوں نے پاکستان کے آئی ٹی سیکٹر کو ترقی کی نئی راہوں پر گامزن کر دیا ہے، اور موجودہ رفتار کو دیکھتے ہوئے یہ کہا جا سکتا ہے کہ پاکستان کی آئی ٹی انڈسٹری مستقبل میں عالمی ٹیکنالوجی کے نقشے پر ایک نمایاں مقام حاصل کرے گی۔