لاہور میں گرج چمک کے ساتھ بارش کا امکان ، دیگر علاقوں میں موسم گرم وخشک رہنے کی توقع ہے،محکمہ موسمیات

پیر 16 جون 2025 21:56

لاہور (اُردو پوائنٹ اخبارتازہ ترین - اے پی پی۔ 16 جون2025ء) محکمہ موسمیات کی پیشگوئی کے مطابق آئندہ چوبیس گھنٹوں کے دوران لاہور سمیت شمال مشرقی علاقوں گوجرانوالہ، سیالکوٹ اور گرد ونواح میں چند مقامات پر تیز ہوائوں،آندھی اور گرج چمک کے ساتھ بارش کا امکان ہے تاہم دیگر علاقوں میں موسم گرم اور خشک رہنے کی توقع ہے۔

(جاری ہے)

ترجمان محکمہ موسمیات کے مطابق گزشتہ چوبیس گھنٹوں کے دوران لاہور ،سیالکوٹ ، نارووال، گجرات،گوجرانوالہ ،سرگودھا ،حافظ آباد، منڈی بہائوالدین ،شیخوپورہ، اوکاڑہ، فیصل آباد،جھنگ،چنیوٹ، ساہیوال، ملتان، خانیوال ، بہاولنگر، رحیم یار خان ، بہاولپور، ڈیرہ غازی خان اور گردونواح میں چند مقامات پرآندھی، جھکڑ چلنے اور گرج چمک کے ساتھ بارش جبکہ بعض مقامات پر موسلا دھار بارش،ژالہ باری بھی ہو ئی۔

لاہور میں کم سے کم درجہ حرارت27 اور زیادہ سے زیادہ37سینٹی گریڈ ریکارڈ کیا گیا جبکہ ہوا میں نمی کا تناسب 30 فیصدرہا۔لا ہور میں آلودگی کی مجموعی شرح 144فیصد رہی جبکہ شہر کے مختلف علاقوں جن میں لا ہور ایچ سی عسکری ٹین 132،فیز ایٹ ڈی ایچ اے 77، عبداللہ کھوکھر ہاوس 126،جوہر ٹاون 97، پاور جنریشن پرائیویٹ لمیٹڈ 97 اور عسکری ٹین میں 97 ایئر کوالٹی انڈیکس ریکارڈ کیا گیا۔