نریندر مودی کے دورہ کینیڈا کے خلاف خالصتان تحریک کے حامیوں کا احتجاجی مظاہرہ

ہزاروں مظاہرین نے بھارتی وزیر اعظم نریندر مودی کے خلاف شدید نعرے لگائے گئے

منگل 17 جون 2025 14:22

اوٹاوہ (اُردو پوائنٹ اخبارتازہ ترین - این این آئی۔ 17 جون2025ء)خالصتان تحریک سے وابستہ سکھوں نے کینیڈا کے شہر کیلگری میں دو روزہ جی7 سربراہی اجلاس میں بھارتی وزیر اعظم نریندر مودی کی شرکت کے خلاف زبردست احتجاجی مظاہرہ کیا۔کشمیرمیڈیاسروس کے مطابق مظاہرے کی قیادت خالصتان تحریک رہنماء منجندر سنگھ نے کی۔مظاہرے کا آغاز کیلگری کے دشمیش گرودوارہ سے ہوا، جہاں ہزاروں مظاہرین نے بھارتی وزیر اعظم نریندر مودی کے خلاف شدید نعرے لگائے گئے۔

مظاہرین نے اس موقع پر نریندر مودی کے پتلے بھی نذر آتش کئے ۔ میڈیا رپورٹس کے مطابق کیلگری میں مظاہرے کے دوران بھارتی وزیر اعظم کو جیل نما پنجرے میں قید بھی دکھایا گیا۔مظاہرے کے منتظمین نے میڈیا سے بات کرتے ہوئے نریندر مودی کو "کینیڈا کا دشمن" قرار دیا۔

(جاری ہے)

ان کا کہنا تھا کہ مظاہرے کا مقصد مودی کی سیاست کا خاتمہ اور کینیڈا کو محفوظ بنانا ہے۔

سکھ مظاہرین نے اس عزم کا اظہار کیا کہ جب تک نریندر مودی کینیڈا میں رہیں گے وہ اپنے مظاہرے جاری رکھیں گے۔ مظاہرین نے خالصتان کے حق میں بھی نعرے لگائے۔مظاہرے میں شامل سکھوں نے کینیڈا میں قتل کئے گئے خالصتان تحریک کے رہنماء ہردیب سنگھ نجر کے حق میں نعرے بلند کئے ۔ ہردیب سنگھ نجر کے قتل کا الزام بھارتی خفیہ ایجنسی را پر عائد کیاگیا ہے ۔ بھارت کو جی7سربراہی اجلاس کاشرکت کا دعوت نامہ اجلاس کے آغاز سے چند روز قبل موصول ہواہے، جس سے کینیڈا اور بھارت کے درمیان کشیدہ تعلقات کی نشاندہی ہوتی ہے جب نئی دہلی پر کینیڈا کی سرزمین پر سکھ رہنما کے قتل کا الزام عائد کیا گیا تھا۔