لیبیا کے قریب ایک اور کشتی حادثہ، پاکستانیوں کے جاں بحق ہونے کا خدشہ

حادثے میں مجموعی طور پر 60 سے زائد پناہ گزین اور تارکین وطن لاپتہ اور سمندر برد ہوگئے

ساجد علی بدھ 18 جون 2025 12:22

لیبیا کے قریب ایک اور کشتی حادثہ، پاکستانیوں کے جاں بحق ہونے کا خدشہ

طرابلس ( اُردو پوائنٹ اخبارتازہ ترین۔ 18 جون 2025ء ) لیبیا کے قریب ایک اور کشتی حادثہ ہوا ہے جس کے نتیجے میں پاکستانیوں کے جاں بحق ہونے کا خدشہ ظاہر کردیا گیا۔ میڈیا رپورٹس کے یہ افسوسناک حادثہ واقعہ 12 جون کو لیبیا کے شہر تریپولیٹانیا کی الشاب بندرگاہ کے قریب پیش آیا جہاں کشتی الٹنے کے واقعے میں کم از کم 5 پاکستانیوں کے جاں بحق ہونے کا خدشہ ہے جب کہ حادثے میں مجموعی طور پر 60 سے زائد پناہ گزین اور تارکین وطن لاپتہ اور سمندر برد ہوگئے۔

بتایا گیا ہے کہ اس حادثے میں اب تک صرف 5 افراد کو زندہ بچایا جا سکا اور باقی تمام افراد تاحال لاپتہ ہیں، حادثے میں مرنے والوں میں 6 اریٹریائی شہریوں میں 3 خواتین اور 3 بچے شامل ہیں اس کے علاوہ 5 پاکستانی، 4 مصری اور 2 سوڈانی مرد بھی اس حادثے میں جان گنوا بیٹھے جب کہ مرنے والوں میں شامل 4 دیگر افراد کی شناخت ممکن نہ ہو سکی۔

(جاری ہے)

علاوہ ازیں 13 جون کو طبرق کے مغرب میں 35 کلومیٹر کے فاصلے پر پیش آنے والے ایسے ہی ایک اور واقعے میں صرف ایک شخص کو زندہ بچایا جاسکا، مقامی ماہی گیروں نے اس شخص کی جان بچائی، کشتی میں سوار دیگر 39 افراد سمندر میں ڈوب گئے بعدازاں 2 لاشیں ام عقیقہ ساحل پر اور ایک لاش طبرق شہر کے الرملا ساحل سے برآمد ہوئی، ان لاشوں کی شناخت کا عمل جاری ہے۔

قبل ازیں 12 اپریل کو مشرقی لیبیا کے شہر سرت کے قریب حراوہ کے ساحل پر کشتی الٹنے کے ایک واقعے میں 4 پاکستانی جاں بحق ہوئے جب کہ رواں سال اب تک کم از کم 743 افراد یورپ جانے کی کوشش کے دوران بحیرہ روم عبور کرتے ہوئے موت کے منہ میں جاچکے ہیں جن میں سے 538 افراد وسطی بحیرہ روم کے راستے سمندری سفر کر رہے تھے، حکومت پاکستان نے ان واقعات پر سخت تشویش کا اظہار کرتے ہوئے انسانی سمگلنگ کے خلاف کریک ڈاؤن کا سلسلہ شروع کیا ہوا ہے۔