ناصر اقبال کا ایشین انفرادی سکواش چیمپئن شپ میں شاندار کارکردگی کا مظاہرہ، کوارٹر فائنل میں جگہ بنا لی

بدھ 18 جون 2025 17:03

اسلام آباد (اُردو پوائنٹ اخبارتازہ ترین - اے پی پی۔ 18 جون2025ء) پاکستان کے نامور سکواش کھلاڑی ناصر اقبال نے 23ویں ایشین انفرادی سکواش چیمپئن شپ میں شاندار کارکردگی کا مظاہرہ کرتے ہوئے کوارٹر فائنل میں جگہ بنا لی ہے۔ بدھ کو ملائیشیا میں کھیلے گئے پہلے میچ میں پاکستان کے ناصر اقبال نے ہانگ کانگ کے لی چیوک نام کو 1-3 سے شکست دی، ان کے جیت کا سکور 11-7، 2-11، 11-5 اور 11-8 رہا۔

(جاری ہے)

دوسرے میچ میں پاکستان کے نوجوان کھلاڑی نور زمان کو ایک سنسنی خیز مقابلے کے بعد ملائیشیا کے جوایچم چوآ کے ہاتھوں 2-3 سے شکست کا سامنا کرنا پڑا۔ میچ کے سیٹس 3-11، 3-11، 11-3، 12-10 اور 2-11 رہے۔ اگرچہ نور زمان نے درمیانی سیٹس میں عمدہ واپسی کی کوشش کی تاہم آخری سیٹ میں ان کا کم بیک مکمل نہ ہو سکا۔ قومی کھلاڑی ناصر اقبال اب کوارٹر فائنل میں ہانگ کانگ کے ہنری لیونگ سے مقابلہ کریں گے۔ قومی سکواش حلقوں اور شائقین کی جانب سے ان کے لیے نیک تمنائوں کا اظہار کیا جا رہا ہے اور امید ہے کہ وہ مزید فتوحات کے ساتھ چیمپئن شپ میں پاکستان کا نام روشن کریں گے۔