پنجاب یونیورسٹی کیمب کے زیر اہتمام تربیتی ورکشاپ کا انعقاد

بدھ 18 جون 2025 23:06

لاہور (اُردو پوائنٹ اخبارتازہ ترین - این این آئی۔ 18 جون2025ء)پنجاب یونیورسٹی سنٹر آف ایکسی لینس ان مالیکیولر بائیولوجی (کیمب) کے زیراہتمام جینوم ایڈیٹنگ میںسی آر آئی ایس پی آر/سی اے ایس سسٹمز پر تین روزہ ہینڈ زآن ٹریننگ ورکشاپ کا انعقاد کیاگیا۔ اس موقع پر چیئرمین پنجاب ہائر ایجوکیشن کمیشن پروفیسر ڈاکٹر اقرار احمد خان، وائس چانسلر پنجاب یونیورسٹی پروفیسر ڈاکٹر محمد علی، ڈائریکٹر کیمب پروفیسر ڈاکٹرمعاذالرحمن، فوکل پرسن پروفیسر ڈاکٹر عبدالقیوم راؤ، فیکلٹی ممبران اور محققین نے شرکت کی۔

چیئرمین پنجاب ہائر ایجوکیشن کمیشن پروفیسر ڈاکٹر اقرار احمد خان نے ورکشاپ کا افتتاح کرتے ہوئے کیمب میں ہونے والی تحقیق کے معیار کو سراہا۔ انہوں نے کیمب کی بنیاد رکھنے والے ڈاکٹر ریاض الدین اور دیگر سائنسدانوں کی دور اندیشی، کاوشوں کو خراج تحسین پیش کیا۔

(جاری ہے)

انہوں نے شرکاء کوعلم اور مہارت میں اضافے کیلئے کیمب کے محققین سے استفادہ کرنے پر زور دیا۔

وائس چانسلر پروفیسرڈاکٹر محمد علی نے کیمب کے محققین کی کاوشوں کی تعریف کرتے ہوئے کہا کہ یہ سنٹرپنجاب یونیورسٹی کا سب سے بڑا تحقیقی مرکز ہے۔ انہوں نے شرکاء کی حوصلہ افزائی کرتے ہوئے تربیتی مواقع سے زیادہ سے زیادہ فائدہ اٹھانے کی ترغیب دی۔انہوں نے کہا کہ یہ ورکشاپ نوجوان محققین کے مستقبل کی تشکیل میں اہم ثابت ہو سکتی ہے۔ انہوں نے ڈاکٹر اقرار احمد خان کا شکریہ ادا کیا اور ابھرتی ہوئی ٹیکنالوجی پر ورکشاپ منعقد کرنے پر ڈاکٹرمعاذ الرحمن اور ان کی ٹیم کو سراہا۔

ڈاکٹرمعاذ الرحمن نے معزز مہمانوں اور شرکاء کو خوش آمدید کہا۔ انہوں نے جدید سائنس میںسی آر آئی ایس پی آرٹیکنالوجی کی اہمیت پر روشنی ڈالی اورکیمب مختصر تاریخ پر روشنی ڈالی۔ ڈاکٹر عبدالقیوم راؤ نے تربیتی پروگرام کا جائزہ پیش کرتے ہوئے شرکاء کو ورکشاپ کیلئے موصول ہونے والی درخواستوں بارے بتایا۔ انہوں نے کہا کہ ورکشاپ کیلئے ملک بھر کے تعلیمی اداروں سے 33 شرکاء کوشارٹ لسٹ کیا گیا۔ انہوں نے تربیتی سیشن کے انعقاد میں ٹیم کی لگن اور محنت کو بھی سراہا۔ بعد ازاں معزز شرکاء کے درمیان سووینئرز کا تبادلہ ہوا۔