اسرائیل امدادی مراکز کے قریب طاقت کا مہلک استعمال بند کرے، یو این ادارے

اسلام آباد (اُردو پوائنٹ ۔ UN اردو۔ 19 جون 2025ء) اقوام متحدہ کے امدادی اداروں نے غزہ میں بھوکے شہریوں پر فائرنگ اور ہلاکتوں کو تشویش ناک قرار دیتے ہوئے اسرائیل سے کہا ہے کہ وہ امدادی قافلوں اور مراکز کے قریب مہلک طاقت کے استعمال سے گریز کرے۔

غزہ میں لوگوں کو امداد کی فراہمی کے لیے اسرائیل اور امریکہ کے قائم کردہ متبادل نظام کے تحت چار مقامات پر 'غزہ امدادی فاؤنڈیشن' نامی نجی ادارے کے ذریعے خوراک تقسیم کی جا رہی ہے۔

امدادی امور کے لیے اقوام متحدہ کے رابطہ دفتر (اوچا) نے کہا ہے کہ ان مراکز پر آنے والے بھوکے فلسطینی شہری متواتر فائرنگ کا نشانہ بن کر ہلاک و زخمی ہو رہے ہیں۔

(جاری ہے)

ادارے کی جانب سے جاری کردہ بیان میں ایسے واقعات کو ہولناک قرار دیتے ہوئے انہیں روکنے کا مطالبہ کیا گیا ہے۔

غیرمسلح افراد کی ہلاکتیں

غزہ میں خوراک کی فراہمی کے متبادل نظام نے 27 مئی سے کام شروع کیا تھا جس میں اقوام متحدہ کے کسی ادارے کا کوئی کردار نہیں۔

اس سے قبل شمالی غزہ کے مغربی علاقے بیت لاہیہ میں بھی ایسے ہی ایک واقعے میں درجنوں افراد ہلاک و زخمی ہوئے۔

اقوام متحدہ کے دفتر برائے انسانی حقوق (او ایچ سی ایچ آر) نے کہا ہے کہ ایسی کوئی اطلاعات موصول نہیں ہوئیں کہ ہلاک یا زخمی ہونے والے لوگ لڑائی میں ملوث اور مسلح تھے یا اسرائیلی فوج اور امدادی مراکز کے عملے کے لیے کسی خطرے کاباعث تھے۔

شہریوں کے تحفظ کا مطالبہ

اقوام متحدہ کے عالمی پروگرام برائے خوراک (ڈبلیو ایف پی) نے گزشتہ مہینے غزہ میں 9,000 میٹرک ٹن خوراک پہنچائی ہے۔ تاہم 21 لاکھ ضرورت مند لوگوں کے لیے مزید بڑے پیمانے پر امداد کی ضرورت ہے۔

ادارے نے شہریوں اور امدادی کارکنوں کو تحفظ کی فراہمی کا مطالبہ کرتے ہوئے کہا ہے کہ بہت سے لوگ خوراک حاصل کرنے کی کوشش میں ہلاک ہو چکے ہیں۔

امداد میں اضافے کی ضرورت

'ڈبلیو ایف پی' نے کہا ہے کہ بھوک اور خوراک کی اشد ضرورت کے باعث بڑی تعداد میں لوگ نقل و حرکت کے راستوں پر جمع ہو جاتے ہیں تاکہ امدادی قافلوں کو راستے میں روک کر ان پر موجود سامان کو اتار سکیں۔ ایسے حالات میں بڑے پیمانے پر خوراک کی فراہمی سے ہی حالات مستحکم ہوں گے۔

ادارے نے امدادی قافلوں کو ہنگامی بنیاد پر تحفظ کی فراہمی کا مطالبہ کرتے ہوئے کہا ہے کہ انہیں مختلف علاقوں میں مدد پہنچانے کے لیے بلاتاخیر اجازت ملنی چاہیے، رابطے کے ذرائع بحال ہونے چاہئیں اور مزید سرحدی گزرگاہیں کھولنےکی بھی ضرورت ہے تاکہ بڑی مقدار میں امداد غزہ میں پہنچ سکے۔ اس معاملے میں کسی طرح کی تاخیر کی قیمت انسانی زندگیوں کی صورت میں چکانا پڑے گی۔