8ویں نیشنل وومن لاء کانفرنس کا کامیاب انعقادلائق ِ تحسین ہے، ملک عبدالناصر

کراچی (اُردو پوائنٹ اخبارتازہ ترین - این این آئی۔ 19 جون2025ء)چیئرمین اے کے فاؤنڈیشن ملک عبدالناصر خلجی ایڈووکیٹ نے 8ویں نیشنل وومن لاء کانفرنس کے کامیاب انعقاد پر سینئر ایڈووکیٹ ندیم شیخ اور چیئرمین کانفرنس سلیم مائیکل ایڈووکیٹ کو دلی مبارکباد پیش کرتے ہوئے کہا ہے کہ جسٹس ہیلپ لائن انٹرنیشنل اور سندھ ہائی کورٹ بار ایسوسی ایشن کی یہ کاوش خواتین وکلا کے لیے نہ صرف ایک حوصلہ افزا پلیٹ فارم ہے بلکہ یہ قانونی میدان میں صنفی مساوات، شعور اور انصاف کی فراہمی کے لیے ایک سنگ میل کی حیثیت رکھتی ہے۔

انہوں نے مزید کہا کہ اے کے فاؤنڈیشن خواتین کی فلاح، قانونی آگاہی اور انصاف کے یکساں مواقع کی فراہمی کے لیے ہر ممکن تعاون فراہم کرتی رہے گی۔یہ عظیم الشان کانفرنس جسٹس ہیلپ لائن انٹرنیشنل اور سندھ ہائی کورٹ بار ایسوسی ایشن کے اشتراک سے آرٹس کونسل آف پاکستان کے آڈیٹوریم میں منعقد ہوئی، جس میں دو سیشنز رکھے گئے۔

(جاری ہے)

پہلے سیشن کی مہمانِ خصوصی صوبائی وزیر برائے ترقی خواتین محترمہ شاہینہ شیر علی تھیں، جب کہ اعزازی مہمان وزیر اعلیٰ سندھ کے مشیر برائے انسانی حقوق راجور سنگھ تھے۔

دونوں مہمانوں نے فیتہ کاٹ کر کانفرنس کا افتتاح کیا۔اپنے خطاب میں صوبائی وزیر شاہینہ شیر علی نے خواتین کی فلاح، پالیسی سازی اور امتیازی قوانین کے خاتمے کے لیے جسٹس ہیلپ لائن سے سفارشات طلب کیں اور وزارت کی ترجیحات پر روشنی ڈالی۔کانفرنس کے روح رواں سینئر ایڈووکیٹ ندیم شیخ اور چیئرمین کانفرنس سلیم مائیکل ایڈووکیٹ نے اس موقع پر کانفرنس کے اغراض و مقاصد، مقامی و قومی سطح پر اس کی افادیت اور ماضی کی کانفرنسز کے مثبت نتائج پر مفصل روشنی ڈالی۔

کانفرنس کے دوسرے سیشن کے مہمانِ خصوصی چیف جسٹس سندھ ہائی کورٹ جناب جسٹس محمد جنید غفار تھے، جب کہ جسٹس ظفر راجپوت نے بھی خصوصی شرکت فرمائی۔اپنے خطاب میں چیف جسٹس نے کہا:کہ خواتین کو بااختیار بنائے بغیر معاشرے کی ترقی ممکن نہیں۔ وکلاء اور ججز کی حیثیت سے خواتین نے عدلیہ میں شاندار خدمات انجام دی ہیں، اور اس طرح کی کانفرنسز ان کی صلاحیتوں کو جِلا بخشتی ہیں۔

انہوں نے ندیم شیخ ایڈووکیٹ اور ان کی ٹیم کو خراجِ تحسین پیش کیا اور ایسی مزید تربیتی نشستوں اور کانفرنسز کی ضرورت پر زور دیا۔اختتام پر خواتین وکلاء اور ججز میں اعزازی ایوارڈز تقسیم کیے گئے، جب کہ مہمانانِ گرامی کو سندھ کی ثقافتی پہچان اجرک بھی پیش کی گئی۔تقریب سے سندھ ہائی کورٹ بار ایسوسی ایشن کے صدر بیرسٹر سرفراز متیلو، کراچی بار کے جنرل سیکریٹری رحمان کورائی، آرگنائزر فریدہ منگریو، احمد شاہ، جہانزیب خان، عاطف اقبال، حارث امین بھٹی، پروفیسر جی این قریشی، وہاب منشی، سید اسرار علی، سید ذوالفقار شاہ و دیگر معزز شخصیات نے بھی اظہارِ خیال کیا۔