پشاور پولیس کی کارروائی، اندھے قتل کا سراغ لگا کر خاتون سمیت تین ملزمان گرفتار

جمعرات 19 جون 2025 18:02

پشاور (اُردو پوائنٹ اخبارتازہ ترین - اے پی پی۔ 19 جون2025ء) پشاور پولیس نے جدید سائنسی خطوط اور ٹیکنیکل بنیادوں پر جامع تفتیش کے دوران تیرائی پایاں میں ملنے والی مسخ شدہ نعش کی شناخت اور اندھے قتل کا سراغ لگاتے ہوئے قتل میں ملوث خاتون سمیت تین ملزمان کو گرفتار کرلیا۔

(جاری ہے)

ترجمان پولیس کے مطابق گرفتار ملزمان نے 5 جون کو مقتول میراجان ولد آغا جان کو قتل کیا تھا، گرفتار ملزمان اور مقتول آپس میں دوست تھے ،وقوعہ کے دن زبانی تکرار پر طیش میں آکر تینوں ملزمان جواد ولد سرتاج، مسماۃ (ح) زوجہ جواد اور اشرف ولد اسطرف نے میراجان کو بے دردی کیساتھ تشدد کرکے قتل کر دیا تھا اور نعش کو ٹھکانے لگانے کیلئے خالی مکان میں پھینک کر فرار ہوگئے تھے۔

ملزمان نے دوران تفتیش اصل حقائق کو پولیس کے سامنے بیان کرتے ہوئے قتل کرنے کا اعتراف کرلیا، جدید سائنسی خطوط اور ٹیکنیکل بنیادوں پر گرفتار ملزمان سے مزید تفتیش جاری ہے جبکہ خاتون ملزمہ کو مزید تفتیش کیلئے وومن پولیس اسٹیشن منتقل کردیا ہے۔