سپیکر قومی اسمبلی سردارایازصادق سے برطانوی ہائی کمشنر جین میریٹ کی ملاقات، دوطرفہ تعلقات سمیت باہمی دلچسپی کے دیگر امور پر تبادلہ خیال

جمعرات 19 جون 2025 18:13

اسلام آباد (اُردو پوائنٹ اخبارتازہ ترین - اے پی پی۔ 19 جون2025ء) سپیکر قومی اسمبلی سردار ایاز صادق سے برطانوی ہائی کمشنر جین میریٹ نے جمعرات کو پارلیمنٹ ہائوس میں ملاقات کی جس میں دوطرفہ تعلقات سمیت باہمی دلچسپی کے دیگر امور پر تبادلہ خیال کیا گیا ۔ سپیکر نے برطانوی ہائی کمشنر سے بات چیت کرتے ہوئے کہا کہ پاکستان-برطانیہ تاریخی تعلقات مزید مضبوط بنانے کے لیے پارلیمانی تعاون ناگزیر ہے، پاکستان برطانیہ کے ساتھ دوستانہ تعلقات کو مزید مستحکم کرنے کا خواہاں ہے۔

سپیکر نے پارلیمانی روابط کو باہمی ہم آہنگی کے لیے کلیدی قرار دیا اور کہا کہ پاکستان کی پارلیمنٹ ہائوس کو دنیا کی پہلی "گرین پارلیمنٹ" ہونے کا اعزاز حاصل ہے، پارلیمنٹ آف پاکستان کی عمارت کو 2015ء میں شمسی توانائی پر منتقل کیا گیا، پارلیمانی انٹرنشپ پروگرام میں انرولمنٹ کے لیے 60 ہزار سے زائد نوجوانوں نے دلچسپی ظاہر کی۔

(جاری ہے)

انہوں نے کہا کہ رواں سال جون میں شروع ہونے والے 'سمر انٹرن شپ پروگرام' میں 200 طلباء کو انٹرن شپ کا موقع فراہم کیا گیا، نوجوانوں کو جمہوری عمل سے روشناس کرانے کے لیے پارلیمانی تربیت ناگزیر ہے۔

شفافیت کو فروغ دینے کے لیے قومی اسمبلی کے 1400 سے زائد ملازمین کے انٹرویوز خود کیے، ملازمین کی اے آئی اور آئی سی ٹی میں تربیت سے گورننس میں بہتری آئے گی۔قانون سازی کے معیار میں بہتری کے لیے لیجسلیٹو کونسل اور تکنیکی سٹاف کو میرٹ پر ایف پی ایس سی کے ذریعے بھرتی کیا گیا۔پرائیویٹ ممبرز بلز کو کمیٹیوں کے ذریعے جائزہ لے کر ایوان میں پیش کیا جاتا ہے۔

برطانوی ہائی کمشنر جین میریٹ نے پاکستان-برطانیہ تعلقات کو مزید فروغ دینے کے عزم کا اعادہ کیا اور کہا کہ برطانیہ پارلیمانی تعاون کے ذریعے دوطرفہ تعلقات کو فروغ دینا چاہتا ہے۔برطانوی ہائی کمشنر نے پارلیمانی اصلاحات اور نوجوانوں کی شمولیت کے اقدامات کو سراہا اور پاکستان کی گرین انرجی اصلاحات پر خراج تحسین پیش کیا۔ انہوں نے کہا کہ قانون سازی کے معیار میں بہتری لانے کے لیے دونوں ممالک کی پارلیمانوں کے تجربات کا تبادلہ اہم ہے، برطانیہ تعلیم، موسمیاتی تبدیلی اور سماجی ترقی کے شعبوں میں پاکستان کے ساتھ تعاون جاری رکھے گا۔