محرم امن اور بھائی چارے کو فروغ دینے کا مہینہ ہے،مولانا طاہر اشرفی

جمعرات 19 جون 2025 22:55

گوجرانوالہ (اُردو پوائنٹ اخبارتازہ ترین - اے پی پی۔ 19 جون2025ء) پاکستان علماء کونسل کے چیئرمین مولانا طاہر اشرفی نے کہا ہے کہ محرم امن اور بھائی چارے کو فروغ دینے کا مہینہ ہے اور اس مقدس مہینے کے دوران کسی کو افراتفری پھیلانے یا امن کو خراب کرنے کی اجازت نہیں دی جائے گی۔ انہوں نے مزید کہا کہ دین اسلام دوسرے مذاہب کے احترام اور احترام کا درس دیتا ہے اور ہمیں ایک دوسرے کا احترام کرنا ہے اور ہم دشمن کے ناپاک عزائم کو کسی صورت کامیاب نہیں ہونے دیں گے۔

ان خیالات کا اظہار انہوں نے کمشنر آفس گوجرانوالہ میں ڈویژنل امن کمیٹی کے اجلاس اور میڈیا سے گفتگو کرتے ہوئے کیا ۔کمشنر گوجرانوالہ ڈویژن سید نویدحیدر شیرازی، آر پی او طیب حفیظ چیمہ، ڈپٹی کمشنر نوید احمد، سی پی او رانا ایاز سلیم ودیگر افسران نے اس موقع پر ممبران ڈویثرن امن کمیٹیوں سے ملاقات کی۔

(جاری ہے)

اس موقع پر مولانا خالد حسن مجددی، مولانا محمد یوسف کھوکھر، مولانا سعید احمد کلیروی، سعید احمد صدیقی،مولانا کاظم خرابی ،پروفیسر شہزاد لارنس, پادری عارف بھی موجود تھے۔

مولانا طاہر اشرفی نے کہا کہ علماء کرام معاشرے میں باہمی ہم آہنگی، صبر، بھائی چارے اور امن کے فروغ میں گراں قدر خدمات سرانجام دے رہے ہیں اور حکومت ان کی کاوشوں کو سراہتے ہوئے توقع کرتی ہے کہ محرم الحرام میں بھی مذہبی رواداری اور بھائی چارے کا ایسا مثالی مظاہرہ دیکھنے کو ملے گا۔ انہوں نے کہا کہ ملک اور اسلام دشمن قوتوں سے ہوشیار رہنے کی ضرورت ہے جو ایسے مواقع پر امن، بھائی چارے اور باہمی ہم آہنگی کو نقصان پہنچانے کے لیے سرگرم ہو جاتی ہیں۔ \378