اسرائیلی فوج کا ایرانی فوج تنصیبات اور جوہری تحقیقاتی مرکز پر فضائی حملے، ایرانی ملٹری کمانڈر کو شہید کرنے کا دعویٰ

حملوں میں 60 سے زائد لڑاکا طیارے شامل تھے جنہوں نے 120 بم اور میزائل داغے، تہران میں میزائل پروڈکشن کی متعدد انڈسٹریل سائٹس کو نشانہ بنایا گیا ان اہداف میں وہ فوجی صنعتی مقامات شامل تھے جہاں میزائل کے پرزے تیار کئے جا رہے تھے

فیصل علوی جمعہ 20 جون 2025 12:22

اسرائیلی فوج کا ایرانی فوج تنصیبات اور جوہری تحقیقاتی مرکز پر فضائی ..

مقبوضہ بیت المقدس(اردوپوائنٹ اخبار تازہ ترین۔20جون 2025)اسرائیلی فوج نے تہران میں ایرانی فوجی تنصیبات اور ایک جوہری تحقیقاتی مرکز پر وسیع فضائی حملے کئے ہیں، صہیونی فوج کے ان حملوں میں 60 سے زائد لڑاکا طیارے شامل تھے جنہوں نے 120 بم اور میزائل داغے،اسرائیلی فوج کا ایرانی ملٹری کمانڈر کو شہید کرنے کا دعویٰ، اسرائیلی فوج کا کہنا ہے کہ تہران کے قلب میں رات سے جاری حملوں کا سلسلہ مکمل کرلیا گیا۔

اسرائیلی فوج کے مطابق تہران میں میزائل پروڈکشن کی متعدد انڈسٹریل سائٹس کو نشانہ بنایا گیا۔خبر رساں ادارے رائٹرز کے مطابق اسرائیلی فوج کا کہنا ہے کہ نشانہ بنائے گئے مقامات میں تہران میں واقع متعدد میزائل سازی کے کارخانے شامل تھے۔ جو ایران کی وزارت دفاع کے صنعتی مرکز کے طور پر کام کر رہے تھے۔

(جاری ہے)

رات بھر میں ایران پر کئے گئے حملوں میں درجنوں فوجی اہداف کو نشانہ بنایا گیا۔

صہیونی فوج کا کہنا ہے کہ انہوں نے ایران میں ریسرچ اینڈ ڈیویلپمنٹ آف نیوکلیئر ویپنز پروجیکٹ کے ہیڈکوارٹرز کو بھی نشانہ بنایا۔اسرائیلی فوج کا کہنا ہے تہران پر کئے گئے حملوں میں 60 سے زائد لڑاکا طیاروں نے حصہ لیا۔اسرائیلی فوج کے مطابق ان اہداف میں وہ فوجی صنعتی مقامات شامل تھے جہاں میزائل کے پرزے تیار کئے جا رہے تھے اور وہ تنصیبات بھی جہاں میزائل انجن کیلئے خام مال تیار کیا جا رہا تھا۔

یہ حملے ایس پی این ڈی جوہری منصوبے کے صدر دفتر پر بھی کیے گئے، جو صہیونی فوج کے مطابق اس جنگ کے دوران پہلے بھی نشانہ بنایا جا چکا ہے۔اسرائیلی فوج نے مزید کہا کہ ایک اور مقام کو بھی نشانہ بنایا گیا جہاں ایران کے جوہری ہتھیاروں کے پروگرام کیلئے ایک کلیدی جزو تیار کیا جا رہا تھا۔دریں اثنا، اسرائیلی فوج نے ایران کے مزید 3 میزائل لانچرز تباہ کرنے اور ایرانی ملٹری کمانڈر کو شہید کرنے کا دعویٰ کرتے ہوئے کارروائی کی ڈرون فوٹیج بھی جاری کردی ہے۔

صہیونی فوج کے مطابق اسرائیلی فضائیہ نے حالیہ کارروائی میں ایران میں واقع 3 بیلسٹک میزائل لانچرز کو تباہ کر دیاگیا جو اسرائیل پر حملے کیلئے تیار حالت میں تھے۔اس حملے میں ایک ایرانی فوجی کمانڈر کو بھی ہلاک کر دیا گیا جو اس لانچ سائٹ پر موجود تھا اور میزائلوں کی تیاری میں ملوث تھا۔