یونیورسٹی آف سرگودھا کے وائس چانسلرپ کی ایچ ای سی کے چیئرمین سے ملاقات

سرگودھا (اُردو پوائنٹ اخبارتازہ ترین - اے پی پی۔ 20 جون2025ء) یونیورسٹی آف سرگودھا کے وائس چانسلرپروفیسر ڈاکٹر قیصر عباس نے ہائرایجوکیشن کمیشن (ایچ ای سی) پاکستان کے چیئرمین پروفیسر ڈاکٹر مختار احمد سے ملاقات کی۔ ملاقات میں اعلیٰ تعلیم سے متعلقہ مسائل، درپیش چیلنجز اور ان کے ممکنہ حل پر تفصیلی گفتگو کی گئی۔ اس موقع پریونیورسٹی آف سرگودھا کے ڈائریکٹراورک پروفیسر ڈاکٹر احمد رضا بلال بھی موجود تھے۔

ملاقات کے دوران چیئرمین ایچ ای سی نے کہا کہ تعلیم، ہنر اور تکنیکی تربیت پائیداراورجامع اقتصادی ترقی کی بنیاد ہیں۔ افرادی قوت چاہے وہ فعال ہو یا غیر فعال، کو مستقبل کی سرمایہ کاری اور خود روزگاری کے لیے تیار کرنا وقت کی اہم ضرورت ہے۔ انہوں نے اس ضمن میں مینجمنٹ ٹریننگ پروگرامز اور بزنس انکیوبیٹرز کے قیام کو ناگزیر قرار دیا۔

(جاری ہے)

انہوں نے یونیورسٹی آف سرگودھا کو ایچ ای سی کی ایویلیوایشن 2024 میں ''ایکس کیٹیگری ریسرچ یونیورسٹی'' کا اعزاز حاصل کرنے پر وائس چانسلر پروفیسرڈاکٹر قیصرعباس کو مبارکباد دی۔

پروفیسرڈاکٹر قیصرعباس نے چیئرمین ایچ ای سی کو ''پاکستان ون ہیلتھ یونیورسٹی نیٹ ورک'' میں یونیورسٹی کی پیش رفت اور تحقیقاتی سرگرمیوں سے آگاہ کیا۔ انہوں نے او آئی سی ممالک کے ساتھ آئی آر سی ایچ-یونیورسٹی آف سرگودھا کے تعاون کو وسعت دینے کی کوششوں پر بھی روشنی ڈالی، تاکہ ون ہیلتھ کے فوائد خطے بھر میں پھیلائے جا سکیں۔ڈاکٹر مختار احمد نے اس بات پر زور دیا کہ پاکستان میں مہارت کے فروغ کے نظام میں صنعت کی مؤثر شراکت داری کی کمی ایک اہم مسئلہ ہے، جو گریجویٹس کے لیے ضروری عملی مہارتوں کے حصول کو مشکل بناتی ہے اور ملکی کاروباری مسابقت کو بھی متاثر کرتی ہے۔

ڈاکٹر قیصر عباس نے کہا کہ فنی طور پر مضبوط طلبہ تیار کرنے کے لیے تربیت کو سرمایہ کاری تصور کیا جانا چاہیے۔ انہوں نے واضح اور مربوط قومی ایجنڈا تشکیل دینے پر زور دیا جو اعلیٰ تعلیمی اداروں کی سطح پر مہارتوں کی ترقی کو بطور پالیسی اپنائے۔وائس چانسلر نے کہا کہ تعلیم اور صنعت کے درمیان مضبوط روابط ہی وہ ذریعہ ہیں جو نہ صرف اعلیٰ تعلیم کو صنعتی بنیادوں پر استوار کر سکتے ہیں بلکہ پاکستان کوعالمی سطح پر مسابقت کے قابل بھی بنا سکتے ہیں۔

ان کا کہنا تھا کہ ملک کی اقتصادی ترقی بھی تعلیمی اداروں اور صنعتوں کے مابین بہتر ہم آہنگی سے ممکن ہے۔انہوں نے اس بات پر بھی زور دیا کہ ہمیں انسانی وسائل کی ترقی پر توجہ مرکوز کرنی چاہیے اور نوجوانوں کو مقامی اور بین الاقوامی منڈیوں میں مؤثر کردار ادا کرنے کے لیے درکار مہارتوں سے آراستہ کرنا چاہیے۔چیئرمین ایچ ای سی نے وائس چانسلر ڈاکٹر قیصر عباس کی کمزور طبقوں سے تعلق رکھنے والے طلبہ کو تعلیم کے مواقع فراہم کرنے کی کوششوں کوبھی سراہا اور انہیں تعلیم کے معیار کو ترجیح دینے کی ہدایت کی تاکہ معاشرے میں حقیقی تبدیلی ممکن بنائی جا سکے۔